G.Bayramlı keçmiş müavinin partiyaya ittihamlarını əsassız sayır

Xalq Cəbhəsi Partiyası sədrinin beynəlxalq əlaqələr üzrə müavini Razi Nurulla partiyadan istefa verməsi haqda bəyanat yayıb.

R.Nurulla istefasına konkret səbəb göstərmədən, AXCP sədri Əli Kərimli ilə arasında “Himalay dağı boyda uçurum olması” kimi obrazlı ifadə işlədir. Daha sonra R.Nurulla siyasi sahədə Ə.Kərimli ilə birgə getməyin mümkünsüzlüyünü bəyan edir. R.Nurulla partiyadan istefa verməsini partiya daxilində “avtoritar düçüncənin qalib gəlməsi”, fikir müxtəlifliyinə dözümsüzlük, aqressiya kimi dəyərləndirir. Onun fikrincə, Ə.Kərimli demokratiya uğrunda mübarizəni əngəlləyir və əngəlləməkdə davam edir.

R.Nurulla partiyadan getməsinə səbəb kimi partiyadaxili demokratiyanın olmamasını, sədrin partiya üzvlərini öz təbliğatçısına çevirməsini, öz ətrafına potensial rəqibi kimi baxmasını, partiyanın müxalifətə qarşı mübarizə aparmasını, xalqın bu partiya ətrafında olmamasını, xalqa yeni siyasi simaların lazım olduğunu göstərir. Partiyadan istefa verən R.Nurulla partiyanın gələcəyi naminə Ə.Kərimlini də istefaya çağırır.

Partiya sədrinin müavini Gözəl Bayramlı Ə.Kərimlinin R.Nurullanı sədr müavinliyindən azad etməsi haqda sərəncam verdiyini nəzərə çatdırıb. Keçmiş müavinin patiyaya qarşı ittihamlarını əsassız, dünənə qədər partiya sırasında olan bir şəxsə yaraşmayan hərəkət adlandırıb. Keçmiş müavinin partiyada demokratik prinsiplərin olmaması haqda ittihamına G.Bayramlı AXCP-nin ölkədə demokratiya uğrunda mübarizə aparmasının bütün dünyaya bəlli olduğu bəyanatı səsləndirib. -05-