General vəzifəsindən azad edilib, oğlu həbs olunub

Bakı/12.07.17/Turan: Prezident Ilham Əliyev general-mayor Novruzəli Orucovun Azərbaycanın Səfərbərlik və Hərbi Xidmətə Çağırış üzrə Dövlət Xidməti rəisinin həqiqi hərbi xidmətə çağırış üzrə müavini - Həqiqi Hərbi Xidmətə Çağırış Baş İdarəsinin rəisi vəzifəsindən azad edilməsi barədə sərəncam imzalayıb.

Sərəncamda generalın vəizfəsindən azad edilməsinin səbəbləri barədə məlumat verilmir.

Müşahidəçilər generalın vəzifədən azad edilməsini onun oğlunun yol hərəkəti qaydalarını kobud pozması, sərnişin avtobusunun sürücüsünə fiziki təzyiq etməsi ilə bağlı olduğunu düşünürlər.

Prezident İ.Əliyev bundan öncə bir neçə dəfə vəzifəli şəxslərin övladları qaydaları pozduğu halda atalarının vəzifədən azad ediləcəyi barədə xəbərdarlıq edib.

Baş Prokurorluğun mətbuat xidmətinin məlumatına görə, generalın oğlu Rüstəm Orucov artıq həbs edilib.

"2017-ci il iyulun 3-də Bakı şəhər sakini Rüstəm Orucov sürücülük hüququndan məhrum olunmasına baxmayaraq, idarə etdiyi BMW markalı 10-OG-300 dövlət nömrə nişanlı avtomobillə yol hərəkəti qaydalarını pozduğuna görə ona əsaslı irad bildirmiş sürücü Sənan Səmədovun idarə etdiyi marşrut avtobusunu 8 dayanacaq təqib edərək sərnişinlərin narahatlığına və insanlarda vahiməyə səbəb olub, vətəndaşların gözü qarşısında bir qrup şəxslə həmin sürücüyə xəsarətlər yetirərək xuliqanlıq edib", - Baş Prokurorluğun mətbuat xidmətinin məlumatında deyilir.

Faktla bağlı iyulun 4-də Bakının Binəqədi Rayon Polis İdarəsinin istintaq şöbəsində Cinayət Məcəlləsinin 221.2.1-ci (bir qrup şəxs tərəfindən xuliqanlıq) maddəsi ilə cinayət işi başlanıb. R.Orucov həmin maddə ilə ittiham olunaraq barəsində məhkəmənin qərarı ilə həbs qətimkan tədbiri seçilib.

Baş Prokurorluq bildirir ki, R.Orucov piyadanın ölümünə səbəb olan yol- nəqliyyat hadisəsi törədib hadisə yerindən qaçdığına görə 2014-cü ildə 4 il müddətinə azadlıqdan məhrum olunub, 2016-cı ildə isə şərti olaraq vaxtından əvvəl həbsdən azad edilib. Yuxarıda qeyd olunmuş xuliqanlıq hadisəsi də məhz onun şərti azadlıqda olduğu dövrdə baş verib. -03D-