Gözəl Bayramlıya qarşı �qaçaqmalçılıq� maddəsi ilə cinayət işi açılıb (YENİLƏNİB)

Bakı/26.05.17/Turan: Azərbaycan Xalq Cəbhəsi Partiyasının sədr müavini Gözəl Bayramlıya qarşı 206.1-ci (qaçaqmalçılıq) maddə ilə cinayət işi açılıb. Bu barədə Azərbaycan Dövlət Sərhəd Xidmətinin məlumatında deyilir.

DSX-nin məlumatına görə, Bayramlı mayın 25-də saat 22.00 radələrində Gürcüstandan Azərbaycan ərazisinə keçərkən Qazax rayonunun Şıxlı sərhəd nəzarət buraxılış məntəqəsində Dövlət Gömrük Komitəsinin əməkdaşları ilə birgə keçirilmiş tədbirlər nəticəsində saxlanılıb.

"G.Bayramova özünü şübhəli apardığına görə əl yükünə baxış keçirilərkən bəyan edilməmiş 12 min ABŞ dolları məbləğində pul vəsaiti aşkar olunaraq götürülüb", deyə məlumatda qeyd edilir.

Faktla bağlı Dövlət Sərhəd Xidmətinin İstintaq və Təhqiqat İdarəsində Cinayət Məcəlləsinin 206.1-ci (qaçaqmalçılıq) maddəsi ilə cinayət işi başlanıb.

İlkin araşdırmalarla G.Bayramovanın 24 may 2017-ci il tarixdə Azərbaycandan Gürcüstana gedərkən üzərində bəyan edilməli olan nağd pul vəsaiti olması müəyyən edilməyib.

Hazırda cinayət işi üzrə zəruri istintaq tədbirləri davam etdirilir, deyə məlumatda bildirilir. -16D06-

* * *

2017 May 26 (Cümə) 13:57:04

Gözəl Bayramlının saxlanması haqqında

Bakı/25.05.17/Turan: Dünən Azərbaycan-Gürcüstan sərhədində saxlanılan AXCP sədr müavini Gözəl Bayramlı DTX əməkdaşlarına təhvil verilib və artıq onlar onu Bakıya gətirirlər. Bu barədə Turan-a hüquq müdafiəçisi Oqtay Gülalıyev bildirib.

Onun sözlərinə görə, bu gün səhər saat 6-da Bayramlını Sərhəd Xidmətinin Şəmkir bölgə idarəsinə gətiriblər. Bayramlıya qarşı cinayət işi açılıb, çox güman ki, "qaçaqmalçılıq" və "saxta puldan istifadə" ittihamları ilə. Onun üzərindən guya 10 min saxta dollar tapılıb, deyə Gülalıyev bildirib.

Gülalıyevin sözlərinə görə, Tbilisidə Bayramlını izləyirdilər. Həbsin səbəbi Bayramlının bu həftə Gürcüstanda həbs olunan və Azərbaycan hakimiyyətinin barəsində axtarış elan etdiyi cərrah Fərman Ceyranovun ailəsinə baş çəkməsi ola bilərdi.

Gülalıyev saxta pul versiyasını tənqidə belə layiq olmayan versiya hesab edir, belə ki, belə çıxır ki, Gürcüstan gömrükçüləri qaçaqmalçılığa "yol veriblər".

Gülalıyevin sözlərinə görə, şahid qismində Qazax rayonunun hüquq-mühafizə orqanları ilə əməkdaşlıq etdiyi ehtimal olunan üç sakini cəlb edilib. Bundan başqa, baqaja baxış zamanı işığı söndürüblər ki, videomüşahidə kameraları pulun qoyulması prosesini çəkməsin.

Bayramlının saat 18:00 radələrində Bakıda olacağı və bu gün məhkəmənin onun barəsində qətimkan tədbiri seçəcəyi gözlənilir.

Gülalıyevin sözlərinə görə, ehtimal olunan ittihamlar çox ciddidir və real azadlıqdan məhrumetmə cəzasına səbəb olacaq.

AXCP Ali Məclisinin keçmiş sədri, mərhum Həsən Kərimovun həyat yoldaşı Almaz Kərimova öz növbəsində Turan-a bildirib ki, mayın 24-də o, Bayramlı ilə birlikdə tibbi müayinə üçün Gürcüstana gedib və onlar dərman təyinatı alaraq, ayın 25-də Azərbaycana qayıdıblar.

O, sərhəd nəzarətini əvvəl keçib və Bayramlını gözləyib. Amma Bayramlı çıxmayıb. Həsənova qayıtmaq istəyib, amma onu buraxmayıblar. Bu, mayın 25-də axşam saat 8 radələrində baş verib. Daha sonra Bayramlı Həsənovanın yanına keçib və onun əşyalarının arasına "nə isə qoyulduğunu" deməyi çatdırıb, amma onu dərhal aparıblar.

Həsənova səhər saat 4-ə qədər sərhəd məntəqəsində Bayramlını gözləyib, çünki sərhədçilər ona Bayramlını yarım saat sonra buraxacaqlarını deyiblər. -06D-

* * *

2017 May 26 (Cümə) 13:53:13

Gözəl Bayramlı həbs edilib (yenilənib)

Bakı/26.05.17/Turan: AXCP sədr müavini Gözəl Bayramlı həbs edilib, onun Bakıya gətiriləcəyi gözlənilir.

O, Sərhəd Xidməti tərəfindən saxlanılıb və ona qarşı cinayət işi açılıb. Bu barədə Turan-a vəkil Elçin Sadıqov bildirib.

Vəkil Bayramlının konkret olaraq nədə ittiham olunduğunu və hansı maddə ilə iş açıldığını bilmir.

Qazax yola düşən AXCP sədr müavini Nurəddin Məmmədli Turan-a bildirib ki, qaçaqmalçılıq ittihamı irəli sürüləcəyini ehtimal edir. "Bu, siyasi sifarişli saxta ittihamdır", deyə o qeyd edib.

Azərbaycan Sərhəd Xidməti bu məsələ ilə bağlı şərh vermir. -16D-

* * *

2017 May 26 (Cümə) 11:44:10

Gürcüstan-Azərbaycan sərhədində AXCP-nin sədr müavini saxlanılıb

Bakı/26.05.17/Turan: Mayın 25-də axşam saatlarında Xalq Cəbhəsi Partiyasının sədr müavini Gözəl Bayramlı Gürcüstandan qayıdarkən gömrük məntəqəsində saxlanılıb.

AXCP lideri Əli Kərimli facebook statusunda yazır ki, Bayramlının çantasına "nə isə qoyublar" və onu saxlayıblar. Bu barədə o, Kərimliyə telefonla məlumat verməyə müvəffəq olub.

Mayın 26-da səhər vəziyyət hələ dəyişməyib, deyə AXCP lideri bildirir.

Bayramlı indiyədək azad edilməyib, ona qarşı hansısa ittihamların irəli sürülüb sürülmədiyi məlum deyil.

Gömrük Komitəsi və Sərhəd Xidməti məsələ ilə bağlı şərh vermir.

Kərimlinin sözlərinə görə, Gözəl Bayramlı Gürcüstanda müalicə alırdı və növbəti kursdan qayıdırdı.

Kərimli hesab edir ki, hakimiyyət Bayramlıya qarşı yalan ittihamlar irəli sürmək və onu həbs etmək istəyir. Məqsəd AXCP-ni nüfuzdan salmaq və partiyanı zəiflətməkdir.

"Gözəl xanıma qarşı hansısa saxta ittihamın irəli sürülməsi onun özünün, təmsil etdiyi AXCP və Milli Şuranın nüfuzuna zərbə vura bilərmi? Qətiyyən yox. Hamı bilir ki, Gözəl xanıma qarşı nə düzüb-qoşsalar, qərəzlidir, saxtadır. Bəs Gözəl xanımın hansısa qondarma ittihamla həbsi şəxsən onun özünü qorxuda, mübarizədən yayındıra bilərmi? Gözəl xanımı tanıyanlar bilir ki, bu sualın da cavabı birmənalı "yox!" cavabıdır. Gözəl xanımın həbsi cəbhəçiləri necə, qorxudub mübarizədən çəkindirə bilərmi? Öz adımdan və minlərlə cəbhəçinin adından deyirəm ki, qətiyyən yox! Bu yanlış qərar veriləcəyi təqdirdə hər birimiz ikiqat artıq mübarizə aparacağıq, həqiqətləri daha da sərt ifadə edəcəyik. Apardığımız mübarizə, bizlər üçün həm də şərəf mübarizəsi olacaq! Rejimi əmin edirəm ki, hətta indi nisbətən passiv olan cəbhəçilər də bu səhv ediləcəyi təqdirdə, daha da aktivləşəcək.

Gözəl xanım həbsdə qalacağı təqdirdə, heç kim həbsdən qorxmayacaq, həbsdən yayınmağa çalışmayacaq. Gözəl xanım həbs olunarsa, həbs edilmək məhrumiyyət kimi deyil, Gözəl xanım həbsdəykən azadlıqda qalmanın əzabından qurtarmaq kimi gələcək bizlərə. Rejim isə bu səhvi axıra qədər davam etsə, xalqın gözündən daha da düşəcək. Beynəlxalq təzyiqlər, hətta sanksiyalar yenidən aktuallaşacaq. Xalq bunların bir şərəfli xanımın dinc mübarizəsindən çəkinəcək qədər qorxaq və zəif olduğunu da görəcək. İslahatçı kimi təqdim etmək istədikləri 1-ci vitse-prezidentlərinin də diktatura tərəfdarı olduğu tam olaraq təsdiqlənəcək. Bütün bunlar sizə lazımdır?", deyə Kərimli yazır. -02D-