Gülər Əhmədova müttəhimlər kürsüsündə də dəyişməyib

Bu gün Ağır Cinayətlərə dair İşlər üzrə Məhkəmədə Əlisultan Osmanovun sədrliyi ilə MM-in keçmiş deputatı Gülər Əhmədovanın işi üzrə hazırlıq iclası keçirilib.

İclas vəkil Əfsar Talıbovun dəlil olmadığı üçün 178.3.2-ci (dələduzluq) maddə ilə cinayət təqibinə xitam verilməsi haqqında vəsatəti ilə başlayıb. Təqdim edilmiş videokadrlara gəlincə, onlar montaj edilib. Xüsusən, videoda Gülər Əhmədovaya pul verildiyi an əksini tapmayıb.

Bundan başqa, Elşad Abdullayev istintaqda ifadə verməyib və Azərbaycana gətirilməyib, onun həyata keçirdiyi gizli çəkiliş isə öz-özlüyündə qanun pozuntusudur.

Vəkil həmçinin 307.1-ci (cinayət haqqında məlumat verməmə) maddə ilə cinayət təqibinə də xitam verilməsini və şahidlər siyahısından vəfat etmiş şəxslərin çıxarılmasını istəyib.

Müdafiəçi eyni zamanda Elşad Abdullayevin ifadə vermək üçün gətirilməsini tələb edib.

Sonda o, Gülər Əhmədova barəsində həbs qətimkan tədbirinin ev dustaqlığı ilə əvəz edilməsini istəyib.

Müttəhim özü – Gülər Əhmədova “fundamental” hüquqlarının pozulduğunu bildirib. “ABŞ Dövlət Departamentinin, ATƏT-in hesabatlarında məni cinayətkar adlandırıblar ki, bu da təqsirsizlik prezumpsiyasının pozulmasıdır. Qoy Dövlət Departamenti və ATƏT nümayəndələri məhkəməyə gəlsinlər”, deyə o tələb edib.

Daha sonra Əhmədova rüşvət alması faktını təkzib edərək, ona böhtan atıldığını və sona qədər mübarizə aparacağını bildirib.

Hakim Əlisultan Osmanov bildirib ki, Elşad Abdullayev məhkəməyə zərərçəkmiş kimi tanınması və 1 mln. manat təzminat ödənilməsi haqqında iddia ilə məhkəməyə müraciət edib.

Dövlət ittihamçısı Eldar Həmzəyev öz növbəsində vəsatətlərin əksəriyyətinə etiraz edib. Bununla belə, məhkəmə müttəhimin vəsatətlərinin əksəriyyətini təmin etməyib,bir qismini  hazırkı vaxtda baxılmamış saxlanılmasını istəyib.

Fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayevin ötən ilin sentyabrında yaydığı qalmaqallı videodan sonra Gülər Əhmədova mandatından imtina edib.Fevralın 13-də isə G. Əhmədova barəsində həbs-qətimkan tədbiri seçilib. Bundan sonra həmin müddət iki dəfə artırılıb.

G. Əhmədova Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) və 307.1-ci (ağır və ya xüsusilə ağır cinayətin hazırlanmasını və ya törədilməsini bilərək həmin cinayət barədə xəbər verməmə ) maddələri ilə təqsirləndirilir.-16D-