Gürcüstan Bakı-Qars layihəsindən imtina edə bilər?

Tbilisi/21.12.12/Turan-BS PRESS:  Qars-Axalkalaki-Tbilisi-Bakı dəmir yolu magistralının tikintisindən imtina Gürcüstanı Avropadan uzaqlaşdıra və Rusiyadan asılı vəziyyətə sala bilər. Bunu dekabrın 21-də ölkə prezidenti Mixail Saakaşvili bildirib.

Bununla da prezident sözügedən layihə ilə bağlı baş nazir Bidzina İvanişvilinin son bəyanatını şərh edib.

Baş nazir “Rezonansi” qəzetinin 21 dekabr sayındakı müsahibəsində deyib ki, Qars-Axalkalaki-Tbilisi-Bakı dəmir yolu magistralının tikintisi bir sıra suallar doğurur.

“Ola bilsin ki, Azərbaycana səfərim zamanı bu məsələləri qaldırdım və bizə dost ölkəyə yumşaqcasına bildirdim ki, hansısa mərhələdə bu, bizim üçün faydalı olmayacaq və bu məsələnin nizamlanması lazımdır”, - B.İvanişvili bildirib.

“Mən Qars-Axalkalaki dəmir yol layihəsinə yenidən baxılması və dayandırılmasının mümkünlüyü barədə baş nazirin bəyanatından narazıyam. Bu, müstəqil Gürcüstan üçün mühüm layihədir, nəzərə alsaq ki, Gürcüstan Aİ-yə inteqrasiyaya can atır, bu,  Rusiyadan yan keçməklə Avropa ilə əlaqə qurmağa imkan yaradır. Baş nazirin bəyanatı bizi Avropadan uzaqlaşdırar və Rusiya ilə asılı vəziyyətə salar”, - M.Saakaşvili vurğulayıb.  

O qeyd edib ki, “Qars-Axalkalaki-Tbilisi-Bakı dəmir yolu magistralının tikintisindən imtina Gürcüstanın strateji maraqlarına daxil deyil”. “Əgər doğrudan da  bunu etməyə hazırlaşırlarsa, ötən gün Putinin (RF prezidenti) Gürcüstan hökumətindən daxil olan müsbət siqnalları alqışlamasının səbəbi aydındır.  Mən tələb edirəm ki, bu məsələ ilə bağlı cəmiyyətdə müzakirələr aparılsın və hökumət təkbaşına bu istiqamətdə qərar qəbul etməsin”, - M.Saakaşvili vurğulayıb.

Xatırladaq ki, dekabrın 26-da B.İvanişvili Bakıya gələcək.-02D-