Gürcüstan Ermənistana dəmir yolu açılışına razılıq verib?

Tbilisi/06.09.13/Turan-BSPRESS: Rusiya, habelə Gürcüstan və Abxaziya tərəfləri dəmir yolunun Abxaziya hissəsinin açılmasına razılıq verib, bu barədə cümə günü Yerevanda jurnalistlərə Ermənistan Təhlükəsizlik Şurasının katibi Artur Baqdasaryan bildirib.

Ermənistan iqtisadiyyatı üçün strateji əhəmiyyət daşıyan yolun Abxaziya hissəsinin açılışı Ermənistan və Rusiya prezidentləri Serj Sarkisyan və Vladimir Putinin sentyabrın 3-də Moskvadakı görüşündə müzakirə olunnub.

“Gürcüstan tərəfi razılıq verib, Rusiya və Abxaziya tərəfləri də həmçinin. Amma bu prosesdir və biz başa düşməliyik ki, münaqişəli tərəflər var. Lakin əsas odur ki, bu dəmir yolunun açılması və ümumilikdə dəmiryolu kommunikasiyalarının inkişafı üçün siyasi iradə var və bu, birgə bəyanatda (prezidentlərin) əksini tapıb)”, deyə Baqdasaryan bildirib.

Təhlükəsizlik Şurası katibi həmçinin qeyd edib ki, Sarkisyan və Putinin danışıqları zamanı dəmir yollarının inkişafı məsələsi müzakirə olunub və Rusiya tərəfi Ermənistanın dəmiryolu nəqliyyatı sahəsinə irimiqyaslı maliyyə investisiyalarına hazır olduğunu bildirib, xəbəri “Novosti-Armeniya” agentliyi yayıb.

Gürcüstanın baş naziri Bidzina İvanişvili 2013-cü ilin yanvarında Yerevana səfəri zamanı 1992-1993-cü illərdə Gürcüstan-Abxaziya silahlı münaqişəsi nəticəsində dağılmış Abxaziyadan keçən dəmiryolu əlaqəsinin bərpasının Rusiya ilə mübahisəli məsələlərin tənzimlənməsindən sonra mümkün olduğunu bildirib.

Bir müddət əvvəl Tbilisi bildirib ki, yolun açılışı Rusiyanın Gürcüstanın ərazi bütövlüyünü tanıdığı halda mümkündür, yalnız Moskva Abxaziyanı Gürcüstanın bir hissəsi kimi tanımaqdan imtina edib.

Gürcüstanın Ermənistana yolu açmağa hazır olduğu haqqında məlumat təsdiqini taparsa, bu, Bakı üçün xoşagəlməz sürpriz olacaq. Bundan əvvəl Gürcüstan hökuməti Qarabağ münaqişəsi həll edilənə qədər yolun açılmasına qarşı çıxan Azərbaycanın maraqlarını nəzərə alırdı. 

Rəsmi Tbilisi hələlik bu məsələ ilə bağlı fikir bildirməyib. Lakin Gürcüstan parlamentinin hakim partiyadan olan üzvü Viktor Dolidze sentyabrın 6-da “İmedi” telekanalının efirində bildirib ki, dəmir yolunun Abxaziya hissəsinin açılışı məsələsi Gürcüstanda müzakirə olunub, lakin hökumət heç bir qərar qəbul etməyib.

Artur Baqdasaryanın bəyanatını şərh edən Gürcüstan deputatı deyib: “Bilmirəm cənab Baqdasaryan bu barədə hansı kontekstdə bildirib. Bilirəm ki, onlar əvvəllər də iqtisadi layihələr və Abxaziyada dəmir yolunun açılışı haqqında düşünürdülər, indi də düşünürlər, amma bilirsiniz ki, belə bir qərardah söhbət belə gedə bilməz. Məsələyə baxılması və onun müzakirə olunması başqa, hökumət səviyyəsində belə bir qərarın mövcudluğu başqa. Belə bir qərar dəqiq mövcud deyil”.

Aprelin 23-də Strasburqda Avropa Şurası Parlament Assambleyasının (AŞPA) yaz sessiyasında çıxış edən Gürcüstan hökumətinin rəhbəri Bidzina İvanişvili bildirib ki, dəmir yolunun Abxaziya hissəsi gələcəkdə mütləq açılacaq, lakin bu, ilk növbədə Gürcüstanın maraqları nəzərə alınmaqla baş verməlidir. -02D-