Gürcüstan ombudsmanının nümayəndələri təcridxanada Əfqan Sadıqova baş çəkiblər

Avqustun 29-da Gürcüstan Ombudsman Aparatının əməkdaşları “Azel” TV Youtube kanalının rəhbəri Əfqan Sadıqova baş çəkiblər. Bu barədə onun xanımı Sevinc Sadıqova bildirib.  Qeyd edək ki, Əfqan Sadıqov Azərbaycandan ekstradisiya sorğusu əsasında həbs edilib.

"Bu gün Əfqan təcridxanadan zəng elədi. Bütün dostlara salam söylədi. Bu gün Gürcüstanın Ombudsman Aparatının əməkdaşları Əfqana yenidən baş çəkiblər. Onlar Əfqanın siyasi motivli həbsini diqqət mərkəzində saxlayırlar və onunla müntəzəm görüşürlər", - Sadıqova deyib.

Onun sözlərinə görə, Əfqan Sadıqov ona qarşı cinayət işinin saxtalaşdırıldığını bildirib. O, daha öncə həyat yoldaşı ilə təcridxanada görüşdüyünü qeyd edib.

"Əfqan dedi ki, onun işində tanımadığı, heç vaxt görmədiyi və telefonla danışmadığı şəxslərin şikayətləri keçir. İttiham uydurmadır, saxtalaşdırılıb. Əfqan hesab edir ki, Azərbaycana ekstradisiya olunacağı təqdirdə onu daha böyük təhlükə gözləyir. Çünki orada ona daha ağır ittihamlar irəli sürülə bilər. Əfqan əmindir ki, Azərbaycan hakimiyyətini tənqid etdiyinə görə həbs olunub", - Sevinc Sadıqova bildirib.

Xatırladaq ki, ötən il dekabrın 24-də Əfqan Sadıqov ailəsilə birlikdə Gürcüstana gedib. Avqustun 3-də ailəsilə birlikdə İstanbula getmək istəyərkən Gürcüstan polisi tərəfindən saxlanılıb.

Avqustun 4-də Tbilisi Şəhər Məhkəməsi onu Azərbaycana ekstradisiya məqsədilə 3 ay müddətinə həbs edib.

Məhkəmədə bildiriblər ki, mayın 10-da Azərbaycan Daxili İşlər Nazirliyi Əfqan Sadıqova qarşı Azərbaycan Cinayət Məcəlləsinin 188.2.2 və 182.2.4-cü maddələrilə (təhdid yolu ilə tələb etmək, başqasının əmlakını ələ keçirmək, dəfələrlə gözdən salan  informasiyanın dərcilə təhdid etmək)  ittihamlar irəli sürüb.