Gürcüstan RF-nı onun ərazisində “qanunsuz hərəkətlər”ə son qoymağa çağırıb

Bakı/06.08.20/Turan: Gürcüstanda avqust müharibəsinin 12-ci ildönümü ərəfəsində bu ölkənin Azərbaycandakı səfirliyi xüsusi məlumat yayıb: “12 il öncə, 2008-ci ilin avqustunda Gürcüstana qarşı genişmiqyaslı hərbi təcavüz və Gürcüstanın bölünməz bölgələrinin işğalı ilə Rusiya Federasiyası suveren bir dövlət olan Gürcüstanın sərhədlərini zorla dəyişdirməyə çalışdı və Avropa təhlükəsizlik sisteminə də ciddi ziyan vurdu.

On iki ildir ki, Gürcüstan hökuməti və beynəlxalq ictimaiyyətin səylərinə baxmayaraq, Rusiya hər il işğal olunmuş ərazilərdə təhlükəsizliyi, insan haqlarını və humanitar vəziyyəti ağırlaşdıran qanunsuz və təxribatçı hərəkətlərini davam etdirir.

Rusiya Federasiyası, Aİ-nin vasitəçiliyi ilə əldə olunmuş  12 avqust 2008-ci il tarixli atəşkəs razılaşmasına əməl etməməyə davam edir və silahlı qüvvələrini geri çəkmək əvəzinə, Gürcüstanın işğal edilmiş ərazilərində hərbi iştirakını daha da gücləndirir. Eyni zamanda, Moskva Abxaziya və Tsxinvalinin de-fakto ilhaqı istiqamətində addımlar atır.

Hər gün  əsas insan hüquqlarının kobud şəkildə pozulması halları baş verir. Abxaziya və Tsxinvali  Cənubi Osetiyanın işğal olunmuş ərazilərindəki vəziyyəti sürünən işğal və qondarma sərhədləşmə prosesi  daha da gərginləşir.  Yerdə davamlı təxribatlar, istərsə tikanlı məftillərin salınması, qanunsuz həbslər, etnik zəmində ayrı-seçkilik, Gürcüstan vətəndaşlarının həyatına qəsd,  sərbəst hərəkətin məhdudlaşdırılması, ana dilində təhsilin qadağan edilməsi və s.  müharibə və münaqişə əziyyət çəkən əhali üçün  ağır bir yükdur.

Eyni zamanda, etnik təmizləmə nəticəsində işğal olunmuş ərazilərdən qovulmuş yüz minlərlə məcburi köçkün və qaçqının hələ də evlərinə qayıtmasına icazə verilmir.

Paralel olaraq, Rusiya hibrid vasitələrdən fəal şəkildə istifadə edir və istədiyi mesajları yaymaqla, o cümlədən tarixi saxtalaşdırmaqla qondarma “yeni bir gerçəkliyin” qurulmasına  çalışır.

Gürcüstan münaqişənin sülh yolu ilə həlli siyasətini əzmlə davam etdirir və Gürcüstan hökuməti beynəlxalq birliyin Gürcüstanın suverenliyi və ərazi bütövlüyünə dəstəyi,  tanımama siyasətini və münaqişənin sülh yolu ilə həlli prosesinə verdiyi dəstəyi yüksək qiymətləndirir.

Məhz beynəlxalq birliyin möhkəm və konsolidə edilmiş səyləri ilə, 2008-ci il avqust müharibəsinin ağır  nəticələrini aradan qaldırmaq və Rusiya-Gürcüstan münaqişəsinin beynəlxalq hüquq çərçivəsində sülh yolu ilə həll edilməsi yolunda uğur əldə edilə bilər.

Gürcüstan tərəfi bir daha Rusiya Federasiyasını Gürcüstan ərazisindəki qanunsuz əməllərini dayandırmağa və beynəlxalq öhdəliklərini yerinə yetirməyə, xüsusən də Gürcüstanın işğal olunmuş bölgələrin qondarma müstəqilliyin tanınması qərarını dəyişdirməyə və  Aİ-nin vasitəçiliyilə əldə edilmiş 12 avqust 2008-ci il tarixli atəşkəs razılaşmasına əməl etməyə çağırır”. 

Avqustun 7-də saat 15:00-da Gürcüstanın Bakıdakı səfirliyinin həyətində həmin sözügedən hadisələrin 12-ci ildönümünə həsr olunmuş fotosərgi və film nümayişi olacaq.

Rusiya Gürcüstanın “işğal” ilə bağlı ittihamlarını rədd edir. Moskva iddia edir ki, Rusiya qoşunlarının münaqişə zonasına daxil olmasına səbəb Gürcüstanın onun nəzarətində olmayan Cənubi Osetiya ərazilərinə qarşı “aqressiyası” və bu “aqressiyanın” nəticələridir.

Azərbaycan Gürcüstanın BMT tərəfindən tanınmış sərhədlərində ərazi bütövlüyünü tanıyır. –06D-