Gürcüstanda parlament böhranı

Tbilisi/18.11.19/Turan: Gürcüstanda növbədənkənar seçkilərin keçirilməsini tələb edən müxalifət təmsilçiləri və onların tərəfdarları ölkə parlamentinə bütün girişləri bağlayıblar və deputatları buraxmırlar, yerli KİV məlumat yayıb.

Binanın qarşısında çadırlar qurulub, parlament özü isə zəncirlə əhatə olunub, ətraf ərazi qum kisələri ilə hasarlanıb.

Mitinqçilər öncə deputat Revaz Arveladzeni parlamentə buraxmayıblar, onlar “Get!” deyə çığırıblar.

Ondan sonra deputatlar Gia Jorjoliani və Merab Kvaraya parlamentə girməyə çalışıblar, lakin piket iştirakçıları ilə münaqişə səbəbindən polisin köməyilə ərazini tərk etməli olublar.

Bütün müxalifət qüvvələri birləşərək növbədənkənar parlament seçkilərinin keçirilməsini  və keçid hökumətinin təyin olunmasını tələb edirlər. Ötən həftə parlamentdə 2020-ci ildə proporsional sistem üzrə parlament seçkilərinin keçirilməsi haqqında qanunun qəbulu baş tutmayıb.

Bundan öncə hakim partiyanın lideri Bidzina İvanişvili qanuna həmin düzəlişlərin qəbul olunmasını vəd etmişdi. Ancaq səsvermə zamanı hakim Gürcü Arzusu Partiyasından olan deputatlar öz partiyalarının qanun layihəsinin baş tutmasına mane olublar.

Müxalifət mövcud proporsional-majoritar sistemi ədalətsiz hesab edir, çünki bu, hakim partiyaya ciddi üstünlük verir. Belə ki, 2016-cı il seçkilərində Gürcü Arzusu Partiyası 48,7% səs toplamışdı, ancaq 150 yerdən 115-ni (77%) və konstitusiya çoxluğu statusunu almışdı.

Bu arada Gürcüstan DİN mitinqçiləri dağıtmaqla hədələyib.-02D-