Hakimə görə, Yasamal yox, İnzibati-İqtisad məhkəməsinin huququ çatır...

Diplomat İlqar Qurbanovun iddiası üzrə məhkəmə prosesi dekabrın 12-si saat 16:00-da 1 saylı Bakı İnzibati-İqtsadi məhkəməsində başlayacaq. Bu haqda Turan-a İ.Qurbanovun bacısı Gülnarə Qurbanova bildirib.

G.Qurbanova deyib ki, İ.Qurbanov Azərbaycan Xarici İşlər Nazirliyni məhkəməyə verib. Buna səbəb bir ildən çoxdur ki, nazirin əmrilə geri çağırılması, başqa işlə təmin olunmaması və gələcək taleyilə bağlı hər-hansı məlumat verilməməsidir. İ.Qurbanov iddiasında ona dəyən maddi və mənəvi ziyanın ödənilməsini tələb edir.    

İ.Qurbanov 20 ildən artıqdır ki, diplomatik xidmət sahəsində çalışır. Son 11 il yarımda isə ancaq xüsusi tapşırıqlar üzrə səfir olub. Azərbaycan XİN-in Kollegiya üzvü və məsul katibi olub. Son iş yeri Çexiyada müşavir-elçi olub. Bu vəzifədə ikən 2012-ci il oktyabrın 1-də nazir Elmar Məmmədyarovun əmrilə Azərbaycana geri çağırılıb. Ötən bir il ərzində işlə təmin edilməyib. 

Bir il gözlədikdən sonra İ.Qurbanov 2013-cü ilin sentyabrında məsələni həll etmək üçün Azərbaycan XİN-i məhkəməyə verib. Oktyabrın 14-də Yasamal məhkəməsində hazırlıq iclası, oktyabrın 29-da məhkəmə prosesi keçirilib. Həmin məhkəmə prosesində hər-hansı səbəb gətirmədən hakim işə 1 saylı Bakı İnizbati-İqtisad məhkəməsinin baxmalı olduğu qərarı verib. 

İş 1 saylı Bakı İnzibati-İqtisad məhkəməsinə göndərilib. Qurbanova dekabrın 12-də məhkəmə prosesi olacağı haqda bildirişi ancaq dekabrın 11-də aldıqlarını söyləyib. İ.Qurbanovun hüquqlarını tanınmış vəkil Fuad Ağayev müdafiə edir.

Xatırladaq ki, İ.Qurbanov Azərbaycanın məşhur dövlət xadimi Şıxəli Qurbanovun oğludur. -05B-