Həbsxanada 35 gündür aclıq edən doktorantın cinayət işinin ibtidai istintaqı başa çatıb

1 saylı Bakı İstintaq Təcridxanasında saxlanılan İstanbul Universitetinin doktorantı Fazil Qasımovla bağlı cinayət işinin ibtidai istintaqı başa çatıb. Hazırda Fazil Qasımov və vəkilləri 7 cildlik cinayət işi ilə tanış olurlar.

Bu barədə Turan-a vəkil Rövşanə Rəhimli bildirib.

Onun sözlərinə görə, Fazil Qasımovun cinayət işi Qubad İbadoğlunun cinayət işindən ayrı icraata ayrılıb.
"Hazırda Fazil Qasımovun işi ilə bağlı Anar Əliyev adlı şəxs də həbsdədir. O, Qasımova qarşı ifadə verib. Hər iki şəxsin işinə enyi məhkəmə prosesində baxılacaq", deyə o, qeyd edib.

Vəkil Fazil Qsımovun 35 gündür aclığı davam etdirdiyini bildirib.

"O, ayrıca kamerada nəzarət altında saxlanılır. Bu, həkim nəzarəti deyil, Qasımovun təhlükəsizliyi ilə bağlı olan nəzarətdir", deyə vəkil bildirib.

Bu gün, iyulun 19-da Fazil Qasımovun anası və qardaşı da onunla görüşüb.

"Görüşümüzə məhdudiyyət qoyulmadı. Anam və mən ona yalvardıq ki, aclığı dayandırsın. O, inadından dönmədi. Dedi ki, heç bir günahı yoxdur, ya aclından öləcək, ya da bəraət alacaq. Fazilin bu durumu ürəyimizi parçalayır. O, 20 kilqoramdan çox arıqlayıb, çəkisi 52 kiloqrama düşüb. Bədəni sanki quruyub. Ayaq üstə müvazinətini saxlaya bilmir. Səsi güclə çıxır, sözü sonadək deməyə nəfəsi çatmır. Onu ayrı kamerada saxlayırlar, yanında daimi nəzarətçi durur. Dedi ki, həkimə ehtiyac duyanda çağırır, həkim gəlir", deyə Fazil Qasımovun qardaşı Nazim Qasımov bildirib.

Penitensiar Xidmətdən şərh almaq mümkün olmayıb.

* Fazil Qasımov 2023-cü il avqustun 8-də İstanbulda tutularaq Azərbaycana gətirilib. Fazil Qasımov Qubad İbadoğluna qarşı qaldırılmış cinayət işinin istintaqı çərçivəsində saxlanılıb və Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə) maddəsi ilə ittiham olunur.

İstintaq onun həbs edilmiş müxalif siyasətçi Qubad İbadoğluna saxta pul ötürdüyünü iddia edir.

Bu yaxınlarda Qasımov Baş Prokurora, Ombudsmana, yerli və beynəlxalq ictimaiyyətə müraciətində bildirib ki, bu ifadələri işgəncə altında verib. O, bu ifadələrdən imtina edib, İbadoğluna saxta pul vermədiyini, onunla heç vaxt FETO (Türkiyədə terrorçu təşkilat hesab olunan ilahiyyatçı Fətullah Gülənin hərəkatı) mövzusunda müzakirələr aparmadığını bildirib.

Qasımov əsassız cinayət təqibinə və istintaqın başlanğıcında ona qarşı işgəncələrə etiraz əlaməti olaraq iyunun 14-dən etibarən aclıq edir.