Hersoq Endryu 12-ci dəfədir Azərbaycana gəlir

 Şahzadə Endryu bu gün Bakıya dörd günlük xüsusi səfərə gəlir, xəbəri Britaniyanın İndependent qəzeti yayıb.

Beynəlxalq təşkilatların Azərbaycanın despot rejimi ilə əməkdaşlıq edənləri kəskin tənqid etməsinə baxmayaraq, o, İlham Əliyevlə danışıqlar aparacaq.

Elə bu yaxınlarda despot rejimlərlə sıx əlaqələrinə görə ünvanına kəskin tənqiddən sonra şahzadə Endryu Böyük Britaniyanın ticarət səfiri vəzifəsini tərk edib.

Bukinhem sarayı kral ailəsi üzvlərinin “xüsusi səfərləri” ilə bağlı şərh verməkdən imtina edib. “Britaniya kral ailəsi üzvlərinin xüsusi səfərləri vergi ödəyiciləri tərəfindən maliyyələşdirilmir”, deyə sarayda bildiriblər. Buna görə şahzadə Endryunun səfərlərini kimin ödədiyi məlum deyil. Kraliçanın ikici oğlu çoxdan təmtəraqlı səyahətlər həvəskarı adını qazanıb.

İndiyədək şahzadə Endryu 11 dəfə İlham Əliyevlə görüşüb və son 10 ildə 7 dəfə Azərbaycana gəlib.

Endryunun Azərbaycan rəhbərliyi ilə isti münasibətləri dünyada hüquq müdafiə təşkilatlarının kəskin tənqidinə səbəb olur, onlar rəsmi Bakı ilə əlaqələri dayandırmağa çağırırlar, deyə İndependent yazır.

Daha sonra məqalədə həbs edilmiş hüquq müdafiəçiləri Leyla və Arif Yunusların, Rəsul Cəfərovun və İntiqam Əliyevin adları yada salınır və qeyd edilir ki, ölkədə siyasi məhbusların sayı 100-dən çoxdur.

Xatırladaq ki, bir müddət əvvəl mətbuat Endryunun Qoqa Aşkenazi adlı rəfiqəsi olduğu haqqında məlumat yayıb. Bu Qazaxıstan vətəndaşı şahzadənin sevgilisi olub, eyni zamanda şahzadənin Qazaxıstanda və digər ölkələrdəki biznesi onun adına rəsmiləşdirilib. -02D-