Hilal Məmmədov DTX-də İqbal Əbilovun işi ilə bağlı dindirilib

Azərbaycan Talışlarının İctimai Şurasının (ATİŞ) İdarə Heyətinin üzvü Hilal Məmmədov yanvarın 23-də Dövlət Təhlükəsizliyi Xidmətində dövlətə xəyanətdə ittiham olunan tədqiqatçı İqbal Əbilovun işi üzrə şahid qismində dindirilib. Məmmədovun Turan-a verdiyi məlumata görə, onu Əbilovun fəaliyyəti, elmi əsərləri və nəşrləri haqqında sorğu-sual ediblər.

"Mən İqbal Əblilovu gənc alim, tədqiqatçı və pedaqoq kimi tanıdığımı dedim. Onun araşdırmaları təkcə talışlara deyil, regionun digər xalqlarına da aid idi. Talış xalqının folkloru, tarixi, mədəniyyəti ilə bağlı bəzi mövzuları mən özüm ona təklif etmişəm", deyə Məmmədov bildirib.

O, İqbalın təqsirsiz olduğundan əmin olduğunu bildirib. "Azərbaycan ziyalılarının belə görkəmli nümayəndələri həbsdə olmamalıdırlar, elmi tədqiqatlarını davam etdirmək üçün azadlıqda olmalıdırlar", deyə Məmmədov bildirib.

O qeyd edib ki, dindirmə iki saata yaxın davam edib, ona qarşı nəzakətli rəftar olub.

DTX-dən şərh almaq mümkün olmayıb.

* İqbal Əbilov 22 iyul 2024-cü il tarixində dövlətə xəyanət, xarici təşkilatların tapşırığı ilə dövlət əleyhinə çağırışlar, milli və dini ayrı-seçkilik salmaq ittihamları ilə saxlanılıb. Bütün bu cinayətlərin Ermənistan xüsusi xidmətlərinin göstərişi ilə törədildiyi iddia olunur.

Əbilov ittihamları rədd edir və müstəsna olaraq elmi fəaliyyətlə məşğul olduğunu bildirir. Dünyanın müxtəlif ölkələrindən olan alimlərdən ibarət böyük bir qrup Əbilovun azad edilməsinə köməklik etmək xahişi ilə Azərbaycan rəhbərliyinə müraciət edib. Hüquq müdafiəçiləri Əbilovu siyasi məhbus kimi tanıyıblar.

19 noyabr 2024-cü il tarixində məhkəmə Əbilovun həbs müddətini 4 ay uzadıb.