Hilal Məmmədovun Hüquqlarını Müdafiə Komitəsi onun azad edilməsini tələb edir

“Tolışi sədo” qəzetinin həbs edilmiş redaktoru Hilal Məmmədovun Hüquqlarını Müdafiə Komitəsi mayın 15-də bəyanatla çıxış edərək, ona qarşı irəli sürülmüş ittihamları təkzib edib, cinayət işini isə sifarişli və siyasi motivli adlandırıb.

“Hilal Məmmədov istintaqın təqdim etdiyi kimi narkoman deyil. O, hər zaman gəncləri sağlam, əxlaqlı və düzgün həyat tərzinə çağıran ziyalıdır”, deyə bəyanatda bildirilir.

Dövlətə xəyanət, habelə milli ayrı-seçkilik salmaq ittihamları uydurmadır. Azərbaycanın və talış xalqının oğlu olan Məmmədov həmişə milli-etnik və dini tolerantlıq təbliğatçısı olub, deyə bəyanat müəllifləri qeyd edir.

Məmmədovun həbsinin əsl səbəbi onun fəal vətəndaş mövqeyi, cəsur hüquq-müdafiə fəaliyyəti, obyektiv və prinsipial jurnalist fəaliyyəti, talış xalqının milli-mənəvi-mədəni dəyərlərinin təbliğidir, deyə bəyanatda bildirilir.

Komitet son günlər sosial şəbəkələrdə və bəzi KİV-lərdə “1993-cü il Lənkəran hadisələri” haqqında videokadrların yayılmasını təxribat kimi qiymətləndirir. Söhbət Əlikram Hümmətovun Talış-Muğan respublikasını elan etməsindən və bu kadrlarda Hilal Məmmədovun iştirakından gedir.

Bəyanat müəllifləri qeyd edir ki, videoçarx montaj edilib, Məmmədov isə “Azərbaycan dövlətçiliynə qarşı heç bir addım atmayıb”, əksinə, “milli-etnik problemlərin Azərbaycanın ərazi bütövlüyü çərçivəsində həllinə yardım etməyə çalışıb”.

Bəyanat müəllifləri Məmmədovun işinə beynəlxalq diqqəti nəzərə alaraq, hakimiyyəti, məhkəməni və KİV-i korporativ maraqları bir kənara qoyaraq, obyektiv mövqe tutmağa çağırır.

Sonda komitə üzvləri məhkəməni ədalətli qərar çıxarmağa və Məmmədovu azad etməyə çağırır.

* Məmmədov 21 iyun 2012-ci ildə həbs edilib və qanunsuz narkotik saxlamaq, dövlətə xəyanət və milli ayrı-seçkilik salmaqda ittiham olunur. Lakin yerli və beynəlxalq təşkilatlar hesab edirlər ki, Məmmədov siyasi motivlərlə təqib olunur. -06D-