Hilal Məmmədovun işi üzrə məhkəmə prosesi qismən açıq olacaq

Yanvarın 10-da Ağır Cinayətlərə dair İşlər üzrə Məhkəmədə Azər Orucovun sədrliyi ilə “Tolışi sədo” qəzetinin baş redaktoru Hilal Məmmədovun işi üzrə hazırlıq iclası davam edib.

Vəkil Cavad Cavadov bir qrup vətəndaş cəmiyyəti fəalı və hüquq müdafiəçiləri adından H.Məmmədovun zaminə buraxılması haqqında vəsatət verib. Müraciəti Arzu Abdullayeva, İntiqam Əliyev, Əlövsət Əliyev, Rəşid Hacılı, Vidadi İsgəndərov, Əsabəli Mustafayev, Ənnağı Hacıbəyli və başqaları imzalayıblar. 

Lakin dövlət ittihamçısı Tural Yusifov buna və müdafiə tərəfin digər vəsatətlərinə etiraz edib.

Hakim H.Məmmədovun həbsdən azad edilməsi, işin təkrar istintaqa göndərilməsi, audio və videoçəkiliş aparılması da daxil olmaqla, vəsatətlərin əksəriyyətini rədd edib. 

Bəzi vəsatətlərə isə dinləmələr zamanı baxıla bilər, deyə hakim bildirib.

Daha sonra prokuror “dövlət sirri” olduğu üçün prosesi qismən qapalı keçirməyi xahiş edib.

Vəkillər prokurordan “dövlət sirrinin” konkret olaraq nədən ibarət olduğunu açıqlamağı xahiş ediblər. Onlar dövlət ittihamçısının qəsdən açıq prosesə mane olduğu fikrini ifadə ediblər.

Müttəhim vəkillərlə razı olduğunu bildirib və qapalı prosesin saxtakarlıqları və yalançı şahidlikləri ictimaiyyətdən gizlətmək məqsədi daşıdığını qeyd edib. 

H.Məmmədov bildirib ki, proses qapalı olsa o, iştirakdan imtina edəcək.

Bundan sonra hakim Orucov yenidən fasilə elan edib, daha sonra isə 274 (dövlətə xəyanət), 283.2.2-ci (milli və dini ayrı-seçkilik salınması) maddələr üzrə prosesin qapalı, 234.4.3-cü (qanunsuz narkotik saxlama və yayma) maddə üzrə isə açıq olacağını elan edib.

Növbəti proses 23 yanvar səhər saatlarına təyin edilib.

Vəkil R.Məmmədov Turan-a bildirib ki, müdafiə tərəfin təqsirləndirilən şəxslə müşavirədən sonra məhkəmənin qərarına qiymət verəcək.

* H.Məmmədov 21 iyun 2012-ci ildə həbs edilib. Təqsiri sübuta yetirilərsə, o, 15 ilədək azadlıqdan məhrum edilə bilər. Beynəlxalq hüquq müdafiə və jurnalist təşkilatları Məmmədovu vicdan məhbusu olaraq qəbul ediblər və dəfələrlə onun dərhal azad edilməsini tələb ediblər. -16/06В-