Hilal Məmmədovun işi üzrə məhkəmə prosesində

İyulun 3-də Bakı Ağır Cinayətlər Məhkəməsində “Tolışi sado” qəzetinin baş redaktoru Hilal Məmmədovun işi üzrə məhkəmə prosesində şahidlərin – DİN-in narkobiznez İdarəsinin əməkdaşlarının ifadə vermələri davam edib. 

Polis kapitanı Ceyhun Musayev ziddiyyətli ifadələr verib. Onun sözlərinə görə, H.Məmmədovun saxlanmasında 4 əməkdaş iştirak edib, halbuki, əvvəlki məhkəmə iclasında onun həmkarı əməliyyatda 7 əməkdaşın iştirak etdiyini bildirmişdi. 

C.Musayev əməliyyat və H.Məmmədovun geyiminə baxış üçün operativ qrupun olması ilə bağlı rəsmi qərarın olub-olmaması barədə vəkilin sualına dəqiq cavab verə bilməyib. 

Vəkil Ramiz Məmmədov deyib ki, 2012-ci il iyunun 22-25-də o, bir neçə dəfə həmin şahidləri Nizami polisində görüb. Lakin hakim Azər Orucov onun sözlərini kəsərək  bildirib ki, “vəkilin şahid kimi çıxış etməyə ixtiyarı yoxdur”.  

Hakim vaxtaşırı vəkilin sözlərini kəsərək ya onlara düzəliş verib, ya da qəbul etməyib.

Vəkil diqqəti ona yönəldib ki, H.Məmmədova qandal onun saxlanması barədə rəsmi qərardan əvvəl taxılıb. “Bu, faktiki olaraq qeyri-insani, təhqiredici hərəkətdir”, - o vurğulayıb.

Şahidlik edən polis kapitanı H.Məmmədovdan mobil telefonun götürülməsini inkar edib. Halbuki, mobil telefon sübutlar siyahısındadır. Polis bunu izah edə bilməyib.  

Vəkil və H.Məmmədov qeyd ediblər ki, mobil rabitə operatorundan çıxarış sübut edir ki, H.Məmmədov polisdə olarkən mobil telefon aktiv olub. Bundan əlavə, əməliyyatçılar onun telefonundan evinə zəng edərək “onun həkimdə olduğunu” bildiriblər.

H.Məmmədov deyib ki, polislər onun şalvarının cibindən mobil telefonunu çıxararkən narkotik maddəni də atıblar.

Kapitan Musayev və DİN-in həmin idarəsinin digər zabiti Qasım Hüseynov H.Məmmədova qarşı güc tətbiqini inkar ediblər. Lakin məhkəmə-tibbi ekspertizası H.Məmmədovun baldırında 5 mm. dərinliyində yara olub.  

H.Məmmədov özü deyib ki, yara polislərin ayaq zərbələri nəticəsində əmələ gəlib. O, kompleks məhkəmə-tibbi ekspertizasının keçirilməsi, işgəncə faktının tanınması, onun döyülməsində iştirak edən və digər cinayət işləri üzrə narkodilerlərin himayədarı kimi adı keçən polis zabitləri Xələfov və Hümbətovun fəaliyyətinin araşdırılması barədə vəsatət qaldırıb.

Proses iyulun 10-da davam edəcək. -06C-