H.Məmmədovun işi üzrə məhkəmədə müstəntiq müdafiə tərəfin suallarına cavab verməyə çətinlik çəkib

Bu gün “Tolışi sədo” qəzetinin redaktoru Hilal Məmmədovun işi üzrə prosesdə Nizami rayon polis idarəsinin müstəntiqi Ceyhun Kərimovun şahid ifadələri dinlənilib.

Müdafiə tərəfin onun dindirilməsində israr edirdi. Məhz bu müstəntiq Məmmədova qarşı 234.4.3-cü (böyük ölçüdə narkotik maddələrin qanunsuz saxlanılması və ticarəti) maddə ilə ittiham irəli sürüb və onun kirayə tutduğu evdə axtarışa icazə verib.

Vəkilin suallarından məlum olub ki, müstəntiq bir sıra prosessual normaları pozub. Belə ki, şahidləri cəlb edərkən, o, onların kimliyini müəyyən edərək, ünvanlarını onların sözlərinə görə qeydə alıb.

Müstəntiq H.Məmmədovun kirayə tutduğu evdə axtarışı “təxirəsalınmaz zərurətlə” izah edib. Lakin mənzilin mülkiyyətçisi başqa insan idi və buna görə axtarış məhkəmə qərarı ilə aparılmalı idi.

Vəkilin axtarışın yekunlarına görə protokolda 11 nəfərin adının keçdiyi, amma cəmi 8 nəfərin imzasının olduğu barədə sualına cavabda müstəntiq deyib ki, “bəziləri imza atmağı unudub”.

Vəkil həmçinin H.Məmmədovun kompüterinin müsadirəsi zamanı qanun pozuntularına yol verildiyini bildirib.

İnformasiya müsadirəsi müdafiə tərəfin iştirakı olmadan həyata keçirilib və kompüterin hafizəsinə sonradan onun sahibini gözdən salan materiallar yazılıb.

H.Məmmədovun işi üzrə növbəti məhkəmə iclası avqustun 21-də keçiriləcək.

H.Məmmədov 21 iyun 2012-ci ildə qanunsuz narkotik saxlamaq ittihamı ilə həbs edilib. Sonradan ona qarşı dövlətə xəyanət və milli ayrı-seçkilik salmaq ittihamları irəli sürülüb. Amnesty İnternational onu “vicdan məhbusu” kimi tanıyıb. -06D-