Human Rights Watch: Avropa Şurası Bakını cavab verməyə çağırmalıdır

“Azərbaycanda  müstəqil səslərə qarşı uzunmüddətli repressiya ölkənin Avropa Şurasında altıaylıq sədrliyi dövrünün başa çatdığı bir vaxtda böhran həddinə çatıb. Bu barədə Human Rights Watch  təşkilatının Azəıbaycanla bağlı bəyanatında deyilir.

“ Bu vəziyyət, Azərbaycan hökumətinin hüquq müdafiəçilərinə və hökumətin digər tənqidçilərinə ardıcıl  təzyiqi onun Avropa Şurası öhdəliklərinə aydın hörmətsizliyini göstərir. Bu davamlı repressiyanın cavabsız qalması institutun nüfuzuna xələl gətirir”, -  Human Rights Watch təşkilatının Cənubi Qafqaz üzrə baş tədqiqatçısı Giorgi Goqia  deyib.

Təşkilat həmçinin  qeyd edib ki, son iki ildə Azərbaycanda ən azı 50 müstəqil və müxalif fəala, jurnalist, bloqçu və hüquq müdafiəçisinə qarşı əsaslandırılmamış ittihamlar irəli sürülüb. Hazırda onlardan çoxu barmaqlıqlar arxasındadır. Azərbaycan Avropa Şurasında sədrliyə başlayandan hökumət azı 11 nəfəri həbs edib.

HRW Azərbaycanda  olan QHT-in  susdurulmasına yönəlmiş  bir sıra dəyişiklikləri, QHT-lərin bank hesablarının dondurulmasını xatırladıb.

Bununla belə, hüquq müdafiəçiləri Leyla Yunus, Arif Yunus, İntiqam Əliyevin hədəfə alındığı vurğulanır. Naxçıvanda döyülmüş jurnalist İlqar Nəsibovun özünə cinayət işinin açıldığı xatırlanır.

Təşkilat qeyd edir ki, Avropa Şurasının rəhbərliyi, baş katibi, Parlament Assambleyasının prezidenti, insan haqları komissarı, eləcə də üzv dövlətlər Azərbaycan hökumətini bu addımlara dəvət etməlidir:

- Həbsə atılmış  şəxslər dərhal və qeyd-şərtsiz azadlığa buraxılsın, onlara qarşı siyasi motivli işlər ləğv edilsin;

- Müstəqil qurumlara qarşı qorxutma kampaniyası dayandırılsın, onların maneəsiz işinə şərait yaradılsın və çoxdan gözlənilən insan haqları islahatları gecikmədən həyata keçirilsin. -16D-