Hüquq müdafiəçiləri Mehman Əliyevin işi ilə bağlı prezidentə müraciət ediblər

Bakı/30.08.17/Turan: Bir qrup tanınmış azərbaycanlı hüquq müdafiəçisi Azərbaycan prezidentinə müraciət edərək Turan İnformasiya Agentliyinin direktoru Mehman Əliyevin həbsdən azad edilməsinə yardımçı olmasını xahiş edib.

Onlar qeyd edirlər ki, Vergilər Nazirliyinin Vergi Cinayətlərinin İbtidai Araşdırılması Departamentinin Turan agentliyinə qarşı apardığı cinayət araşdırması nəticəsində agentliyin direktoru, Azərbaycanda çağdaş jurnalistikanın inkişafında mühüm xidmətləri olan Mehman Əliyev tələsik həbs olunub.

Hüquq müdafiəçiləri hesab edirlər ki, "Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə" president İlham Əliyevin 10 fevral 2017-ci il tarixli sərəncamına uyğun olaraq istintaq dövründə Mehman Əliyev azadlıqda qala bilər.

Onlar qeyd edirlər ki, istintaq davam etdiyi müddətdə Mehman Əliyevin tələsik həbs edilməsi və yetərli sübutların olmaması xaricdə Azərbaycana qarşı tənqidlərə səbəb olub.

Hüquq müdafiəçiləri bildirirlər ki, Mehman Əliyevin həbsi KİV-ə dövlət qayğısının göstərilməsi barədə Azərbaycan rəhbərliyinin siyasətinə beynəlxalq təşkilatlarda kölgə salır.

Hüquq müdafiəçiləri dövlət başçısından humanistlik göstərərək istintaq dövründə Mehman Əliyevin zaminə buraxılmasına yardımçı olmağı xahiş edir.

Müraciəti hüquq müdafiəçiləri Novella Cəfəroğlu, Səidə Qocamanlı, Səadət Bənənyarlı, Əvəz Həsənov, Mirvari Qəhrəmanlı, Arzu Abdullayeva, Zəlihə Tahirova və Eldar Zeynalov imzalayıblar.-06D--