Hüquq müdafiəçiləri və ictimai fəallar hakimiyyəti Abzas Media və digər müstəqil KİV-lərə qarşı təzyiqə son qoymağa çağırıblar

Böyük bir qrup vətəndaş cəmiyyəti fəalı və hüquq müdafiəçisi Abzas Media internet nəşrinin əməkdaşlarının təqibini pisləyən bəyanat yayıb.

Abzas Media-nın direktoru Ülvi Həsənlinin və baş redaktoru Sevinc Vaqifqızının, habelə nəşrlə əməkdaşlıq edən fəal Məhəmməd Kekalovun qaçaqmalçılıq ittihamıı ilə cinayət təqibinə məruz qalmasının əsassız olduğu bildirilir.

Bəyanat müəllifləri nəşrin ofisində 40 min avro tapıldığı haqqında ittihamların doğruluğuna şübhə edir. Axtarış polisin tam nəzarəti altında keçirilib. Bir media qurumunun öz ofisində hər kəsin rahatlıqla görə biləcəyi bir yerdə bu qədər məbləği saxlaması ağlabatan deyil. 

Eyni zamanda, həbs olunan şəxslərin hüquqlarının pozulduğu qeyd edilir. Belə ki, Həsənli saxlanıldıqdan 6 saat sonra vəkili ilə görüşə bilib, bu zaman o, fiziki təzyiqə məruz qalıb.

Kekalovun ailəsi tərəfindən cəlb edilmiş vəkil yalnız dördüncü gün onunla görüşə bilib. Kekalovun bu vəkildən və onunla məxfi ünsiyyətdən imtina etməsi fəalın etirafedici ifadələr alınması üçün təzyiqə və qeyri-insani rəftara məruz qalması ilə bağlı şübhələri artırır. 

“Hər hansı bir xarici dövlətlə münasibətlərin gərginləşməsi dövlət institutlarının diqqətini çatışmazlıqlara çəkməklə “ictimai nəzarətçi” missiyasını yerinə yetirən jurnalistlər və digər ictimai fəallar üzərində təzyiq üçün arqumentə çevrilməməlidir”, deyə bəyanatda bildirilir. 

Hakimiyyət Abzas Media və digər media orqanlarına qarşı təzyiqə son qoymalı, jurnalistlərin ictimai əhəmiyyətli məsələlərlə bağlı məlumat əldə etmək hüququna müdaxilə etməməli, müxtəlif bəhanələrlə jurnalistləri öz peşəkar fəaliyyətlərinə görə cəzaladırmamalıdır.

Müəlliflər Həsənlinin saxlanıldıqdan sonra uzun müddət vəkillə təmin edilməməsinin səbəblərini, işgəncə və qeyri-insani rəftara məruz qalması ilə bağlı iddialarını vaxt itirmədən obyektiv araşdırmağa, Kekalovun öz ailəsinin seçdiyi vəkil ilə konfidensial görüşünə şərait yaratmağa, “Abzas Media”nın hər üç əməkdaşını azad etməyə çağırırlar.

Bəyanatı 30-a yaxın fəal, hüquqi müdafiəçisi və jurnalist -  Akif Qurbanov, Anar Məmmədli, Asif Oruclu, Ayşən Muradzadə, Bəşir Süleymanlı, Elgiz Qəhrəman, Elməddin Şamilzadə, Emin Abbasov, Əbülfəz Qurbanlı, Əhməd İsmayılov, Fariz Namazlı, Fərid Mehrəlizadə, Gülnarə Mehdiyeva, İmran Əliyev, İntiqam Əliyev, İnarə Camal, Kənan Qayıbov, Məmməd Məmmədzadə, Murad Rüstəmbəyli, Nəcmin Kamilsoy, Nərmin Şahmarzadə, Rəsul Cəfərov, Rövşən Ağayev, Röya Məlikzadə, Rüfət Səfərov, Səməd Rəhimli, Səyyad Yusifli , Sübhan Həsənli, Şəhla Hümbətova, Toğrul İsmayılov, Toğrul Vəliyev, Tural Ağayev, Yalçın İmanov, Zakir Bayramov, Zöhrab İsmayıl imzalayıblar.