Hüquq müdafiəçisinin anasının ölkədən çıxışına qadağa qoyulmasının səbəblərini açıqlamayıblar

Həbsdə olan hüquq müdafiəçisi Rüfət Səfərovun anası Tahirə Tahirqızı yanvarın 6-da şahid qismində ifadə vermək üçün Bakı Şəhər Baş Polis İdarəsinə istintaqa çağırılıb. Ancaq o, ifadə verməkdən imtina edib. Bu barədə Turan-a Tahirqızı özü bildirib.

"Qanunvericiliyə uyğun olaraq ifadə verməkdən imtina etdim və müstəntiqə dedim ki, oğlum böhtan ittihamı ilə həbs edilib", - Tahirqızı deyib.

O, ölkədən çıxmasının niyə qadağan olunduğunu da soruşub.

"Heç bir cavab ala bilmədim", - qadın deyib.

O qeyd edib ki, həyat yoldaşı ağır Parkinson xəstəliyindən əziyyət çəkir və hər yarım ildən bir Türkiyədə müayinədən keçir. Son hadisələr, oğlunun həbsi onun vəziyyətini daha da ağırlaşdırıb.

"Yanvarın 7-nə bilet aldıq ki, həyat yoldaşımı İstanbula müayinəyə aparım. Ötən gün mənə məlum oldu ki, Azərbaycan Daxili İşlər Nazirliyi ölkədən çıxışa qadağa qoyub. Biz pensiyaçıyıq, biletləri öz  pensiyamıza almışıq və getməsək, pul itirəcəyik ki, bu da bizim üçün böyük məbləğdir", - Tahirqızı deyib.

O ümidvar olduğunu bildirib ki, istintaq və  oğlunun həbsinin sifarişçiləri humanizm nümayiş etdirəcəklər və onun atasının xaricə getməsinə imkan verəcəklər.

"Hər dəqiqə istintaqdan zəng gözləyirik. Ümidimizi itirmirik. Sabah ümidimizin son günüdür", - Tahirqızı deyib.

O həmçinin bildirib ki, yanvarın 6-da Rüfət istintaq təcridxanasından zəng edib: "O, atasının səhhətindən və xaricə getməsinin qadağan edilməsindən çox narahatdır".

*Rüfət Səfərov dekabrın 3-də saxlanılıb. Ona qarşı Cinayət Məcəlləsinin üç maddəsi - 178.3.2 (külli miqdarda ziyan vurmaqla törədilmiş dələduzluq), 221.1 (xuliqanlıq) və 127.2.3-cü (qəsdən sağlamlığa daha az ciddi ziyan vurmaq, ümumi təhlükəli üsulla və ya xuliqan səbəblərindən) maddələri ilə ittiham irəli sürülüb. Ertəsi gün məhkəmə onu 4 ay müddətinə həbs edib.

Rüfət Səfərov ittihamları rədd edərək bildirib ki, hüquq- müdafiə fəaliyyətinə və ABŞ Dövlət Departamentinin mükafatına layiq görüldüyünə görə təqib olunur.