Hüquq-mühafizə orqanları jurnalistin qardaşının qanuni olaraq həbs edildiyini iddia edir

Baş Prokurorluq və Daxili İşlər Nazirliyinin mətbuat xidməti İsmayıllıdakı baş vermiş hadisə ilə bağlı növbəti bəyanatını yayıb.

Baş Prokurorluğun mətbuat xidmətindən Turan-a daxil olduğu bəyanatda “Azadlıq” qəzetinin bölgə müxbiri Elçin İsmayıllının qardaşı Elşənin İsmayıllı rayonunda həbs edilməsinin onun peşə fəaliyyəti ilə bağlılığı təkzib edilir.

Prokurorluq Elçin İsmayıllının qərəzli və hüquqa söykənməyən çıxışlarını baş vermiş hadisələri siyasiləşdirməyə cəhd kimi qiymətləndirib.

Bəyanatda deyilir ki, Elşən İsmayıllı yanvarın 23-24-də İsmayıllı rayonunda ictimai qaydanın pozulmasına səbəb olan hərəkətlərdə fəallıq göstərib.

Belə ki, ictimai asayişi pozmağa çalışan rayon sakinlərini bu hərəkətlərdən çəkindirməyə çalışan və onları intizama dəvət edən rayon İcra Hakimiyyətinin vəzifəli şəxsinin qanuni tələblərinə məhəl qoymayan E.İsmayıllı fəal şəkildə müxtəlif qanunazidd çağırışlar etib, bundan sonra polis əməkdaşlarına daş atıb və digər şəxsləri də daş atmağa və qarşıdurmaya təhrik edib.

Elşən İsmayıllı Cinayət Məcəlləsinin 233 (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə təqsirləndirilən şəxs qismində cəlb olunmaqla barəsində Nəsimi rayon məhkəməsinin qərarı ilə həbs qətimkan tədbiri seçilib.

Elşən İsmayıllı iş üzrə şahid qismində, eləcə də müdafiəçisinin iştirakı ilə təqsirləndirilən şəxs qismində dindirilərkən özünü ona elan olunmuş ittihamlar üzrə təqsirli bilərək törətdiyi əməlləri etiraf edib.

Bundan əlavə, prokurorluq Elşən İsmayıllının ictimai qaydanın pozulmasına səbəb olan hərəkətlərdə fəallıq göstərməsi və digər qanunazidd hərəkətlərini əks etdirən videogörüntünü rəsmi saytında  yerləşdirib. (https://www.youtube.com/watch?v=SLvJqOmjGS0) -16D-