İ.Əliyev Avropa İttifaqını tənqid edir, Macarıstanı tərifləyir və Türk İttifaqının gələcəyini proqnozlaşdırır

İkinci Qarabağ müharibəsindən sonra Azərbaycanın bəzi Avropa ölkələri ilə münasibətləri pisləşib. Bu barədə Azərbaycan prezidenti İlham Əliyev cümə axşamı Türk ölkələrinin parlamentlərinin sədrləri ilə görüşdə bildirib.

"Azərbaycanı ləkələmək, bizim işimizə kölgə salmaq, ağa qara, qaraya ağ demək, işğalçını dəstəkləmək, işğala məruz qalanları isə ləkələmək Avropa İttifaqının bəzi üzv ölkələri üçün həyat tərzinə çevrilib... Avropada xüsusi yerə malik olmaq üçün can atan bəzi ölkələr anti-Azərbaycan qruplaşmanı da yarada bilmişlər. Avropa İttifaqına üzv olan ən azı üç ölkə bu gün Azərbaycana qarşı soyuq müharibə elan edib", deyən Əliyev hansı ölkələri nəzərdə tutduğunu dəqiqləşdirməyib.

Daha sonra o, BMT, Avropa İttifaqı və ATƏT-i ədaləti bərpa etmək üçün heç nə etməməkdə ittiham edib və Azərbaycanın öz ərazi bütövlüyünü bərpa etdiyini qeyd edib.

"Biz 28 il gözlədik. Biz sülh yolu ilə bunu həll etmək istədik. Amma biz gördük ki, bizə qarşı çıxanlar bu işğalı əbədi etmək istəyirlər. Biz haqqı bərpa etdik, öz ərazi bütövlüyümüzü müdafiə etdik, suverenliyimizi bərpa etdik", deyə o bildirib.

Daha sonra Əliyev "Ai-də böyük təzyiqə məruz qalan" və "sanksiyalara" məruz qalan Macarıstan hökumətini müdafiə edib. Onun sözlərinə görə, bu, ona görə baş verir ki, "Macarıstan ənənəvi dəyərləri müdafiə edir".

"NATO-nun üzvü olasan, Avropa İttifaqının üzvü olasan, Avropanın mərkəzində yerləşəsən, öz siyasətini aparmaq istəyən bir ölkəyə sanksiya tətbiq edilir. Bəs, demokratiya haradadır? Hamı eyni fikirdəmi olmalıdır? Hamı orada bəzi Qərb ölkələrində oturanların sözü iləmi oturub-durmalıdır? Kim onlara bu haqqı qazandırır? Onların keçmişi qanla doludur. Onların keçmişi müstəmləkəçilikdir. Onların keçmişi xalqlara əzab verməkdir, qanunsuz işğaldır.  bu gün də müstəmləkəçilik siyasəti Avropa İttifaqında davam edir", deyə Əliyev qeyd edib.

Onun sözlərinə görə, Macarıstan "mübarizənin ön cəbhəsindədir" və hər gün təzyiqə məruz qalır. İndi Macarıstan Avropa İttifaqına sədrlik edəcək. " İndidən artıq Macarıstana qarşı plan cızılır ki, bu sədrlik, necə deyərlər, sarsılsın və bu sədrlikdən Macarıstan necə məhrum edilsin", Əliyev belə hesab edir.
Aİ barəsində "hökmünü" verdikdən sonra Əliyev Türk ölkələrinin işıqlı gələcəyindən danışıb. Onun fikrincə, türk dünyasının birləşməsi Türk Dövlətləri Təşkilatını "dünya miqyasında bir güc mərkəzinə" çevirəcək.

"Çünki siz də qeyd etdiyiniz kimi, mövcud olan güc mərkəzləri böhran içindədir. Hərəsinin öz böhran çərçivələri var. Bizim isə əksinə, potensialımız gündən-günə çiçəklənir", deyə İlham Əliyev bildirib.