İ.Əliyev: Biz onlara lazımıq, onlar bizə yox (YENİLƏNİB)

Prezident İlham Əliyev Qərbdə Azərbaycana qarşı “çirkin kampaniya” aparıldığını bildirib. Onun fikrincə, mühüm beynəlxalq tədbirlər ərəfəsində bu kampaniyalar daha da güclənir.

“Öz həyatını erməni pulları ilə quran bəzi ikiüzlü Qərb siyasətçiləri, konqresmenlər, islamofoblar Azərbaycana qarşı müharibə elan ediblər. Bunun əsasında paxıllıq və bəd niyyətlər durur. Təəssüf ki, Avropada faşizm, irqçilik, islamofobiya, ksenofobiya, antisemitizm baş qaldırır. Yəni bu, təkcə müsəlmanlara qarşı yönəlməyib. Amma müsəlman ölkəsinin yüksək inkişafını istəməyən qüvvələr də var. Eyni zamanda, Azərbaycanda beşinci kolon qalıqlarının himayəçiləri bizə qarşı hücumə keçiblər”, deyə Əliyev iyulun 13-də Nazirlər Kabinetinin iclasında bildirib.

O, həmçinin Avropa Oyunları ərəfəsində Azərbaycana qarşı amansız informasiya müharibəsi aparıldığını qeyd edib.

Lakin Əliyevin fikrincə, bu informasiya müharibəsində Azərbaycan xalqı və dövləti qələbə qazanıb.

Bu kampaniya göstərib ki, heç bir xarici qüvvə bizim iradəmizə təsir edə bilməz”, deyə Əliyev bildirib.

O, Oyunların açılışı ərəfəsində Avropa Parlamentində, habelə dinləmələrin yekunlarına dair xüsusi qətnamə qəbul edən AFR Bundestaqında Azərbaycanla bağlı aparılmış müzakirələr haqqında sərt fikir bildirib.

“Bizdən Bundestaqa nə? Onlar özlərini nə hesab edirlər? Onlar dünyanın sahibidirlər, hamı onlara tabe olmalıdır? Bizim onlarla münasibətlərimiz məsafəlidir, biz onlardan heç nə istəmirik. Əksinə, onlara bizim qazımız, müqavilələrimiz, neftimiz, bu coğrafiyada bizim fəaliyyətimiz lazımdır”, deyə Əliyev bildirib.

O, həmçinin AŞPA-da Azərbaycanla bağlı sonuncu tənqidi qətnaməni pisləyib.

Bu zaman Əliyev aparıcı Avropa ölkələrinin liderlərinin rəsmi görüşlərdə onu beynəlxalq təşkilatlar tərəfindən tənqidə fikir verməməyə çağırdıqlarını bildirib.

“Deyirlər ki, fikir verməyin. Biz onsuz da fikir vermirik. Fikir versəydik, onların dediyini edərdik. Bu qətnamələr bizim üçün bir parça kağızdır. Heç vaxt heç kim onları icra etməyəcək”, deyə Əliyev bildirib.

Azərbaycanla əmr dilində danışmaq olmaz, deyə Əliyev bildirib. -06D-

2015 İyul 13 (Bazar ertəsi) 17:50:31

2015-ci ilin birinci yarısında Azərbaycan iqtisadiyyatının artımı 5,7 faiz, qeyri-neft sektorunun artımı isə 9 faiz təşkil edib. Bu zaman sənaye istehsalı 4% artıb. Bu statistika məlumatlarını prezident İlham Əliyev bu gün ölkənin Nazirlər Kabinetinin iclasında açıqlayıb.

Sözügedən dövrdə inflyasiya 3,5% təşkil edib, əhalinin pul gəlirləri 6,2%, kənd təsərrüfatı istehsalı 7,3% artıb.

Birinci yarımildə ölkəyə 12,7 mlrd. manat sərmayə yatırılıb.

Əliyev hesab edir ki, bu nəticələr “dünyanın müxtəlif hissələrində xoşagəlməz proseslər” fonunda əldə olunub. Xüsusən, o, “Yaxın Şərqdə qarşıdurmaların bitmədiyini”, “Avropanın dərin iqtisadi və əxlaqi böhran içərisində olduğunu” qeyd edib.

Əliyev həmçinin qeyd edib ki, Azərbaycan milli maraqları rəhbər tutaraq, bütün beynəlxalq təşkilatlarla, o cümlədən Avropa İttifaqı ilə münasibətləri “bərabərhüquqlu əsaslarla” davam etdirmək niyyətindədir. -06D-

2015 İyul 13 (Bazar ertəsi) 13:53:43

İyulun 13-də prezident İlham Əliyevin sədrliyi ilə Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib.

İclasda İ.Əliyev giriş və yekun nitq söyləyib. Maliyyə naziri Samir Şərifov, rabitə və yüksək texnologiyalar naziri Əli Abbasov, əmək və əhalinin sosial müdafiəsi naziri Səlim Müslümov ilin altı ayının yekunlarına dair məruzələrlə çıxış ediblər.-03D-