İflic olmuş fəalın  xanımı COP29-da izlənildiyini bildirib

Həbsdə olan ictimai fəal, birinci qrup əlil Famil Xəlilovun xanımı Kiçikxanım Xəlilova noyabrın 13-də COP29 konfransı zamanı izlənməyə məruz qalıb.

O, "Yaşıl zona"da ictimai fəal kimi akkreditasiyadan keçib. Konfrans zonasında isə bir gənc onu izləməyə başlayıb.

"Mən İsveç nümayəndələrilə danışarkən həmin gənc bizi planşetə çəkirdi. Bu nümayəndələr arasında həmin ölkənin parlament üzvü də vardı.  İzləmə konfrans zonasından çıxdıqdan sonra da davam etdi. "Koroğlu" metro stansiyasına çatanda mülki geyimli iki nəfər məni izləyirdi. "Nərimanov" metro stansiyasından çıxanda mənə çatdılar və yolumu kəsdilər. Onlar kiməsə zəng edib nəyisə müzakirə etdilər, sonra dedilər ki, "səhv salıblar",-Xəlilova Turan agentliyinə bildirib.

Bu gün o, təcridxanada həyat yoldaşına baş çəkib. Onun sözlərinə görə, 80 günlük aclıqdan sonra fəal çox zəifləyib və qripə yoluxub.

Onun məhkəməsi noyabrın 28-də davam edəcək.   

* Xəlilovlar ailəsi bir neçə il İsveçdə yaşayıb, lakin onlara sığınacaq verməkdən imtina ediblər və bir il əvvəl Azərbaycana deportasiya ediblər. Azərbaycanda Famil Xəlilovu narkobiznesdə ittiham edərək həbs ediblər.