III Respublika Platforması parlament seçkilərində hakimiyyət namizədlərinin əleyhinə səs verməyə çağırıb

III Respublika Platforması bəyanatla çıxış edərək sentyabrın 1-nə təyin edilmiş Milli Məclisə növbədənkənar seçkilərə münasibətini bildirib. Qurum əvvəlcə qeyri-legitim hesab edir.

Platforma öz mövqeyini əsaslandıraraq demokratik seçkiqabağı mühitin olmamasına diqqəti çəkir.

Seçki Məcəlləsinin də daxil olduğu mövcud seçki qanunvericiliyi Milli Məclisə seçkilər daxil olmaqla, istənilən seçkinin azad və ədalətli keçirilməsi üçün obyektiv hüquqi zəmin yaratmır.

Mərkəzi Seçki Komissiyası və aşağı seçki komissiyaları siyasi tərəfsizlik prinsipi üzərində qurulmayıb və ölkədə olan siyasi aktorların paritet təmsilçiliyinə əsaslanmır.

Bundan əlavə, hazırkı seçkilər 2023-cü ilin noyabrından Azərbaycanda başlayan və presedenti olmayan siyasi repressiya şəraitində keçirilir.

Repressiya nəticəsində seçki fəaliyyəti göstərmək imkanı demək olar ki, aradan qalxıb.

Tənqidçi medianı, real vətəndaş cəmiyyətini və prinsipial siyasi qüvvələri sıradan çıxarmağa hesablanan sonuncu siyasi repressiya III Respublika Platformasından da yan keçməyib.

2024-cü ilin martında Platformanın spikeri Akif Qurbanov və Qurucu Heyətinin üzvü Ruslan İzzətli əsassız və siyasi motivli cinayət işi çərçivəsində tutulublar.

Platformanın ofisində aparılan axtarışdan sonra ofis möhürlənib və Platforma hazırda mənzil-qərargah olmadan fəaliyyət göstərməyə vadar olub. Eyni zamanda bütün qurucu üzvlər həbs riski altındadır.

Beləliklə, repressiv ab-hava seçki təşviqatının aparılmasını mümkünsüz edir.

Seçki kampaniyası dövründə vazkeçilməz olan ifadə, sərbəst toplaşma və birləşmə azadlıqları ölkənin siyasi gerçəkliyindən çoxdan silinib.

Ölkədə sərbəst toplaşma azadlığına de-fakto total qadağa qoyulub.

“Siyasi partiyalar haqqında” qanun siyasi partiyaların mövcudluğunu hökumətdən asılı hala gətirib.

Sistemdən kənar ictimai-siyasi təşkilatlanmalara qarşı yönələn repressiv tədbirlər bu təşkilatların bütün mümkün fəaliyyətini dondurub.

Platforma seçiciləri seçkiyə getməyə, ancaq Yeni Azərbaycan Partiyasının namizədlərinə və hakimiyyətin siyasətini açıq şəkildə dəstəkləyən namizədlərə, eyni zamanda hökumətin “peyk”i olan müxalifət partiyalarının namizədlərinə səs verməməyə çağırır.

* 7 dekabr 2023-cü ildə bir qrup ictimai və siyasi fəal Platformanın yaradıldığını elan edib. Qurumun məqsədi Azərbaycanda həqiqətən respublika respublikası idarəetmə üsulunun yaradılmasıdır.

Platformanın təsisçiləri arasında Akif Qurbanov, Araz Əliyev, Elman Fəttah, Rövşən Ağayev, Ruslan İzzətli, Səməd Rəhimli və Yadigar Sadıqlı var. Martda Akif Qurbanov və Ruslan İzzətli “Toplum TV işi”  üzrə həbs olunublar.