İki dindar 4 il, 6 ay müddətinə azadlıqdan məhrum edilib (YENİLƏNİB)

Bu gün Səbayel Rayon Məhkəməsində iki dindar – Bəxtiyar Qurbanovun və Royal Əsgərovun barəsində hökm oxunub. Onlar CM-in 186-cı maddəsi (əmlakın qəsdən məhv edilməsi) ilə təqsirli bilinərək 4 il, 6 ay müddətinə azadlıqdan məhrum ediliblər.

İstintaqın məlumatına görə, onlar aprelin 2-də ilahiyyatçı Taleh Bağırzadənin həbsinə etiraz olaraq Bakı meriyasının binasını yandırmağa cəhd göstəriblər. Lakin bu “cinayət” ilə bağlı sübut yoxdur. Vəkillər ittihamın əsassız olduğunu və şikayət veriləcəyini bildiriblər. —1606D--

*   *   *

2013 Oktyab 29 (Çərşənbə axşamı) 12:37:08

Oktyabrın 28-də ilahiyyatçı Taleh Bağırzadənin məhkəmə prosesi zamanı saxlanılan 4 dindarın barəsində 315.2 maddə (güc tətbiq etməklə polisə müqavimət) ilə cinayət işi qaldırılıb. Bu barədə Turan-a Sabunçu Rayon Prokurorluğundan məlumat verilib. Lakin prokurorluqda həmin şəxslərin adları açıqlanmayıb və bildirilib ki, hələlik onların barəsində həbs qətimkan tədbiri seçilməyib.

Öz növbəsində vəkil Cavad Cavadov Turan-a bildirib ki, saxlanılan dindarlar polisə heç bir müqavimət göstərməyiblər, əksinə özləri amansız rəftara məruz qalıblar. Dindarlar məhkəməyə gəliblər ki, prosesi müşahidə etsinlər. Vəkil güman edir ki, onlara qarşı planlaşdırılmış təxribat törədilib.

Qeyd edək ki, islamçıların hüquqlarını Müdafiə Komitəsi 20 dindarın saxlandığını bildirib. Bu gün məlum olub ki, onların əksəriyyəti 50 manatdan 800 manatadək cəriməni ödəyəndən sonra buraxılıb.

Lakin üç dindar – Musarza Heydərzadə, Abbas Hüseynov və Nail (soyadı məlum deyil) həbsdədir.-16/03D-