İkinci qrup əlili həbs cəzası gözləyir

İyulun 3-də saat 16:00-da Sumqayıt Şəhər Məhkəməsində AXCP fəalı Daşqın Məlikovun barəsində hökm çıxarılması təyin edilib. O, CM-in 234.1 maddəsi (qanunsuz narkotik maddənin əldə olunması və ya saxlanması) ilə ittiham olunur.

Bundan əvvəl prokuror D.Məlikovun barəsində bu maddə üzrə maksimum cəzanın çıxarılmasına – 3 il müddətə azadlıqdan məhrum edilməsinə çağırmışdı. 

Xatırladaq ki, D.Məlikov bronxial astmadan əziyyət çəkir və ikinci qrup əlildir. Müttəhim bütün ittihamları rədd edərək onları siyasi motivli adlandırıb.

Onun tərəfdarları bildirirlər ki, həbsin əsl səbəbi aktiv siyasi fəaliyyətdir. Belə ki, müxalifətçi gənclərin bu yaz keçirilən siyasi aksiyalarının fəal iştirakçısı olub, həmçinin sosial şəbəkələrdə hakimiyyəti tənqid edib.

O, martın 25-də həbs olunub. Hüquq müdafiəçiləri hesab edirlər ki, D.Məlikovun barəsində hökm çıxarılarsa, Azərbaycanda siyasi məhbusların sayı artacaq. Müxtəlif siyahılara görə, onların sayı 80-dən 100 nəfərədək təşkil edir.-06B-