İlham Əliyev 15 sutka həbs cəzası, Siyavuş Novruzov isə töhmət alıb

Bakı/22.08.20/Turan: Hakimiyyətin ən antipatik fiqurlarından biri – hakim partiyanın icra katibinin  müavini Siyavuş Novruzov karantini kobud şəkildə pozduğuna - toyda iştirak etdiyinə görə və utanmadan öz hərəkətlərinə haqq qazandırdığına görə töhmət alıb. Bu barədə Yeni Azərbaycan Partiyasının mətbuat xidməti məlumat verib.

Toyun təşkilatçısı, Prezident Administrasiyasının keçmiş rəhbəri Ramiz Mehdiyevin kürəkəni İlham Əliyev bu gün Abşeron məhkəməsinin qərarı ilə 15 sutka həbs edilib.

Beləliklə, avqustun 18-də karantin dövründə villada nəvəsinə təntənəli toy edən Ramiz Mehdiyevin şıltaqlığı diqqətdən kənarda qalmayıb. Lakin Ramiz Mehdiyev kürəkənini qabağa verərək özü zərbədən kənarda qaldı. Şənlik iştirakçılarına qarşı bu cür sərt sanksiyalar R.Mehdiyevin də cəzalandırılacağından xəbər verir.

Beləliklə, Abşeron Rayon Məhkəməsi İlham Əliyevi karantin rejiminin pozulmasında təqsirli bilib (İnzibati Xətalar Məcəlləsinin 211-ci maddəsi).

İ.Əliyev R.Mehdiyevin qızı ilə evlənmədən öncə heç bir xüsusiyyəti ilə tanınmırdı. Evlənincə biznesə çıxış əldə etdi. Belə ki, paytaxtın bir sıra mənzil kompleksləri və kommersiya obyektləri ona məxsusdur. Ən məşhurları arasında “İzmir” dəbdəbəli kompleksi var. Görünür, bütün bunlar İ.Əliyevə az görünür və R.Mehdiyevin proteksiyası ilə onu Prezident Administrasiyasının ərazi-təşkilati məsələlər şöbəsinə götürüblər.

Onunla çalışanların şahidliyinə görə, sayğısızlıq və tənbəllikdən başqa heç bir cəhəti ilə fərqlənməyib. Bununla belə, bu, İ.Əliyevin Xaçmaz rayonundan parlamentə deputat seçilməsinə mane olmayıb. -02D-