İlham Əliyev - 2014-cü il sənaye ili olacaq

Yanvarın 9-da İlham Əliyevin sədrliyi ilə hökumətin ötən ilin yekunlarına və 2014-cü il üçün qarşıda duran vəzifələrə həsr olunmuş iclası keçirilib.

Dövlət başçısının saytında yer alan məlumata görə, Əliyev ötən ilin yekunlarını uğurlu adlandırıb və ölkənin beynəlxalq imicinin möhkəmləndiyini deyib. Xüsusən, o, “AŞPA-da anti-Azərbaycan kampaniyasının uğursuzluğunu” qeyd etsə də, nəyi nəzərdə tutduğunu konkretləşdirməyib.

Bu fonda Azərbaycanda “ciddi beynəlxalq tədbirlər keçirilib, bir çox ölkələrlə münasibətlərin möhkəmlənməsi üzrə tədbirlər görülüb”.

Qarabağ münaqişəsinə toxunan Əliyev bildirib ki, Ermənistanın qeyri-konstruktiv mövqeyi ilə əlaqədar danışıqlarda heç bir irəliləyiş əldə edilməyib, baxmayaraq ki, ilin sonuna doğru müəyyən “canlanma” baş verib.

Daha sonra o xatırladıb ki. Azərbaycanın büdcəsi Ermənistanın büdcəsindən 8 dəfə çoxdur, əhalisi isə 6 dəfə çoxdur, bu da Azərbaycanın açıq-aşkar üstünlüyünü göstərir. İlham Əliyev bununla məhz nə demək istədiyini dəqiqləşdirməyib.

Daha sonra o deyib ki, ötən il 20 min məcburi köçkün hər cür şəraiti olan yeni mənzillərlə təmin edilib.

İqtisadi göstəricilərə toxunan Əliyev bildirib ki, ÜDM artımı 6%, neft sektorunda artım 9,8%, əhalinin gəlirlərinin artımı 8%, inflyasiya isə cəmi 2,4% təşkil edib.

Ötən il ölkə iqtisadiyyatına investisiyalar rekord həcmdə olub – 28 mlrd. dollar. Ölkənin valyuta ehtiyatları 50 mlrd. dollar təşkil edib.

2013-cü ildə ölkədə 110 min iş yeri açılıb, onların 80-i daimidir. İşsizlik səviyyəsi 5%, yoxsulluq səviyyəsi isə 5,3% təşkil edib.

Ölkənin xarici borcu ÜDM-in 8%-ni təşkil edib ki, bu da “dünyada ən yaxşı göstəricilərdən biridir”, Əliyev belə hesab edir. Daha sonra o, 2013-cü ildə əmək haqqı və təqaüdlərin artırıldığını xatırladıb. 2013-cü ildə ölkənin ilk rabitə peyki buraxılıb.

TAP qaz kəməri layihəsinin həyata keçirilməsi və “Şahdəniz-2” yatağının işlənməsi üzrə sazişlər imzalanıb.

Qarşıda duran vəzifələr haqqında danışan Əliyev 2015-ci ildə Bakı-Tbilisi-Qars dəmir yolunun açılması planlarından danışıb.

Sonda o qeyd edib ki, yeni ilin vəzifələri investisiya proqramlarının həyata keçirilməsi, sahibkarlığa dövlət dəstəyi, makroiqtisadi sabitliyin təmin edilməsi, inflyasiyanın qarşısının alınması, ərzağa olan daxili tələbatların daxili istehsal hesabına təmin edilməsidir.

O, həmçinin korrupsiyaya qarşı mübarizə tədbirlərinin yeni ildə də davam etdiriləcəyini bildirib.

Əliyev deyib ki, 2014-cü il Azərbaycanda sənaye ili olacaq. O, bunun nə demək olduğunu açıqlamayıb. Əliyev həmçinin enerji daşıyıcılarının qiymətinin artırılması məsələsinə toxunmayıb və bir il əvvəl İsmayıllıda baş vermiş iğtişaşlarla bağlı şərh verməyib. -02D-