İlham Əliyev: Azərbaycan daha da güclənəcək

Bakı/18.04.18/Turan: Heydər Əliyevin qoyduğu yol yeganə düzgün yoldur və Azərbaycanın müstəqillik tarixi bunun əyani sübutudur. Bu barədə dövlət başçısı İlham Əliyev aprelin 18-də inauqurasiya mərasimində bildirib.

Uğur göstəriciləri arasında o, "azadlıq və sabitliyi" göstərib.

" Biz siyasi islahatları dərinləşdirərək bütün azadlıqları - söz azadlığını, mətbuat azadlığını, sərbəst toplaşma azadlığını, siyasi fəaliyyət azadlığını təmin etmişik. Bu gün Azərbaycan vətəndaşlarının 80%-i azad internetdən istifadə edir", deyə o bildirib.

Prezident seçkilərinə toxunan Əliyev bildirib ki, namizədlərin çıxışlarında kifayət qədər kəskin tənqid səslənirdi. "Mən bunu alqışlayıram, müsbət təzahür kimi qiymətləndirirəm.

Namizədlərin qaldırdığı məsələlərə diqqətlə baxılacaq və dəyərli təkliflər nəzərə alınacaq", deyə Əliyev bildirib.

Daha sonra o, müxalifəti ittiham edib, antimilli qruplaşma" adlandırıb.

"Onlar tam marginallaşıb. Bu seçkilər bir daha göstərdi ki, onların Azərbaycanın siyasi səhnəsində yeri yoxdur. Onların yerini Azərbaycan xalqı çoxdan müəyyən edib, bu da tarixin zibilxanasıdır".

Dövlət başçısı seçkilərə qatılmayan müxalifət qüvvələrini xarici qrant, ianə hesabına fəaliyyət göstərən, öz dövlətinə qarşı çıxış edən, bir çox hallarda milli satqınlıq nümayiş etdirən ünsürlər adlandırıb.

Daha sonra o, ordunun gücləndirilməsi üzrə son 15 ildə sürətlə görülən tədbirləri davam etdirməyi vəd edib.

Bu gün Azərbaycan ordusu təchizatına, silahlarına, texnika və döyüş qabiliyyətinə görə dünyanın ən güclü orduları arasındadır.

"Aprel döyüşləri bizim şanlı tariximizdir, böyük qələbəmizdir. Azərbaycan Ordusu Ağdərə, Füzuli, Cəbrayıl rayonlarının torpaqlarının bir hissəsini işğalçılardan azad etdi, minlərlə hektar torpağa biz nəzarət edirik. Bu torpaqlara həyat qayıdır, bu torpaqlarda Azərbaycan bayrağı dalğalanır, insanlar qayıdır, yeni qəsəbə salınıbdır. Bizim hərbi qələbəmiz Azərbaycan xalqının gücünü, yenilməz ruhunu göstərir. Onu göstərir ki, Azərbaycan xalqı bu işğalla heç vaxt barışmayacaq. Bunu göstərir ki, biz öz torpaqlarımızı azad edəcəyik. Buna nail olmaq üçün daha da güclü olmalıyıq və olacağıq", deyə o bildirib.

Qarabağ nizamlanması məsələsinə toxunan Əliyev həllin BMT Təhlükəsizlik Şurasının qətnamələrinə əsaslanmalı olduğunu qeyd edib.

"Onu da biz dünya birliyinə, ictimaiyyətinə çatdırırıq ki, nəinki Dağlıq Qarabağ, indiki Ermənistan bizim tarixi torpaqlarımızdır. Təkcə sözlə yox, biz sübutlarla dünya birliyinə bunu çatdırırıq. Elmi əsərlər yazılır, arxivlər qaldırılır, tarixi kitablar yazılır. Bunu sübut edən kifayət qədər tarixi sənəd var. XIX əsrin əvvəllərində İrəvan xanlığının əhalisinin 80 faizini azərbaycanlılar təşkil edirdi. Biz bir neçə deportasiyaya məruz qalmışıq. Bütün bunları biz çatdırmalıyıq, çatdırırıq və bu, öz səmərəsini verməkdədir", deyə Əliyev bildirib.

Ermənistan-Azərbaycan, Dağlıq Qarabağ münaqişəsi yalnız və yalnız ölkəmizin ərazi bütövlüyü çərçivəsində öz həllini tapmalıdır. Bunun başqa yolu yoxdur. "Azərbaycan heç vaxt imkan verməz ki, bizim ərazimizdə ikinci qondarma erməni dövləti yaradılsın", deyə o qeyd edib.

Sonda Əliyev korrupsiyaya qarşı mübarizəni davam etdirməyə söz verib.

"Bu istiqamətdə inzibati tədbirlər, cəza tədbirləri görüləcək və ən böyük səmərə verən sistem xarakterli tədbirlər, institusional islahatlar həyata keçiriləcəkdir. "ASAN xidmət" onların arasında xüsusi yer tutur, biz tədricən bu qurumun funksiyalarını genişləndiririk", deyə Əliyev bildirib. -05D06-