İlham Əliyev: Naxçıvan 100 faiz bərpaolunan enerji ilə təmin olanacaq

Bakı/17.05.18/Turan: "Naxçıvan Muxtar Respublikası bütün iqtisadi göstəricilərinə görə çox sürətlə inkişaf edən respublikadır. Son 15 il ərzində respublikanın ümumi daxili məhsulu on dəfəyə yaxın artıb. Bu, məncə, dünya miqyasında rekord göstəricidir".

Mayın 16-da Naxçıvana səfər edən prezident İlham Əliyev Naxçıvan Müəllimlər İnstitutunun yeni binasının açılışında çıxış edərkən belə deyib.

Prezident Naxçıvanın abadlaşmasından, gözəlləşməsindən, çox böyük quruculuq, yaşıllaşdırma işlərinın aparılmasından bəhs edib. O, qeyd edib ki, Naxçıvan strateji əhəmiyyətlidir, Azərbaycanın təhlükəsizliyi, inkişafı üçün xüsusi rol oynayır.

Naxçıvanın uğurlu inkişafının mərhum prezident Heydər Əliyevin adı ilə bağlı olduğunu vurğalayan İ.Əliyev bildirib ki, H.Əliyev 1990-cı illərin əvvəllərində Naxçıvanı böyük bəlalardan qurtara bilib.

"Bizim mənfur düşmənlərimizin niyyəti, eyni zamanda, Naxçıvanı da işğal etməkdən ibarət idi. Naxçıvana qarşı onlar silahlı hücumlar təşkil edirdilər. Ancaq naxçıvanlılar Ulu Öndərin ətrafında sıx birləşərək düşmənə layiqli cavab verib onları yerinə oturtmuşlar", prezident deyib.

İ.Əliyev bildirib ki, Naxçıvanın uğurlu inkişafı üçün təhlükəsizlik tədbirləri ön planda və prioritet məsələ olmalıdır.

"Naxçıvanın hərbi potensialının gücləndirilməsində böyük işlər görülüb. Azərbaycan Silahlı Qüvvələrinin tərkib hissəsi olan Naxçıvan Ordusu ən müasir silahlar, texnika ilə təchiz edilib. Biz son illər ərzində Azərbaycan Ordusunu böyük dərəcədə gücləndirə bilmişik. Alınan müasir texnikanın demək olar ki, bütün növləri, yaxud da ki, əksər növləri Naxçıvana göndərilir. Bu gün Naxçıvan Ordusu böyük qüvvəyə malikdir və düşmənin istənilən təxribatının qarşısını ala bilər və eyni zamanda, uğurlu əks-hücum əməliyyatı keçirə bilər".

Prezident infrastruktur layihələri haqda danışıb. Qeyd edib ki, Naxçıvanda qazlaşdırma 100 faiz təmin edilib.

"Biz hələ Azərbaycanın ümumi qazlaşdırılmasını təqribən 93-94 faiz səviyyəsində təmin edə bilmişik, bu ilin sonuna qədər 95 faizə çatacaq. Ancaq Naxçıvanda artıq on ildən çoxdur ki, qazlaşdırma 100 faiz təmin edilib", deyən prezident son illərdə 8 elektrik stansiyasının tikildiyini, 36 meqavat gücündə Ordubad Su Elektrik Stansiyasının tikilməkdə olduğunu vurğulayıb.

"36 meqavat gücündə Ordubad Su Elektrik Stansiyası işə düşəndən sonra Naxçıvan öz enerji tələbatının 100 faizini bərpaolunan enerji hesabına təmin edəcək. Bu, dünya miqyasında bəlkə də yeganə belə bir hal olacaq. Bu gün Naxçıvan elektrik enerjisini ixrac edə bilər. Şadam ki, o cümlədən günəş elektrik stansiyası tikilib, su elektrik stansiyaları tikilir və Naxçıvanın artan sənaye potensialını təmin edəcək güclü elektrik təsərrüfatı yaradılır", ölkə başçısı deyib.

Prezident İlham Əliyev mayın 16-da Naxçıvan Muxtar Respublikasına səfər edib.

İ.Əliyev Naxçıvanda bir sıra obyektlərin açılışında iştirak edib.

Ölkə başçısı "Şərur şəhər və ətraf kəndlərinin içməli su təchizatı, kanalizasiya sistemlərinin yenidən qurulması" layihəsinin birinci mərhələsinin, Naxçıvan şəhər Təmizləyici Qurğular Kompleksinin, 6 saylı tam orta məktəbin, Naxçıvan Müəllimlər İnstitutunun yeni binasının açılışına qatılıb.