İlham Əliyev Pakistan Baş Qərargah rəisini və AŞPA prezidentini qəbul edib

Azərbaycan və Pakistan arasında hərb sahədə əməkdaşlığın inkişafı məsələləri martın 1-də İlham Əliyevin Pakistanın Baş Qərargah rəisi Rəşad Mahmudla görüşündə müzakirə olunub.

Azərbaycan prezidentinin mətbuat xidmətinin məlumatına görə, Rəşad Mahmud ölkəsinin Azərbaycanla hərbi əlaqələri bundan sonra da genişləndirməyə və dərinləşdirməyə hazır olduğunu bildirib. “Hazırki səfər bu mənada faydalı olacaq”, deyə o bildirib.

Cavab sözündə İlham Əliyev bütün sahələrdə, o cümlədən hərbi sahədə əməkdaşlığın gələcək inkişafı üçün yaxşı imkanlar və perspektivlər olduğunu bildirib.

Elə bu gün dövlət başçısı AŞPA prezidenti Pedro Aqramuntu qəbul edib.

AŞPA rəhbəri Azərbaycan hakimiyyəti ilə ikitərəfli xarakter daşıyan, habelə regional əhəmiyyət kəsb edən bir sıra mühüm məsələlərin müzakirə edilməsi zərurətini qeyd edib.

Xüsusən, Avropa Şurası və Azərbaycan arasında etimad və qarşılıqlı anlayışın möhkəmləndirilməsi məsələlərinə, həmçinin bir sıra konkret məsələlərə toxunulub, xəbəri dövlət başçısının mətbuat xidməti yayıb. -02D-