İnsan Hüquqları İnstitutunun bazasında Hüquqi Ekspertiza Mərkəzi yaradılır

Bakı/19.05.22/Turan: Dövlət başçısının fərmanı ilə Hüquqi Ekspertiza və Qanunvericilik Təşəbbüsləri Mərkəzi yaradılır. Bu qurum Milli Elmlər Akademiyasının Hüquq və İnsan Haqları İnstitutunun bazasında yaradılır.

Publik hüquqi şəxs olan yeni qurum normayaratma fəaliyyətinin keyfiyyətinin yüksəldilməsi, dövlət orqanları (qurumları) əməkdaşlarının hüquq normalarının tətbiqi sahəsində bilik, bacarıq və səriştələrinin inkişaf etdirilməsi, hüquqi maarifləndirmə, hüquqi ekspertizasının keçirilməsi və hüquqi tənzimləmənin təsirinin qiymətləndirilməsi, habelə qabaqcıl beynəlxalq təcrübə nəzərə alınmaqla Azərbaycan Respublikasında hüquqi islahatların həyata keçirilməsinə dair təkliflər hazırlanması və bunlarla bağlı işlərin səmərəli əlaqələndirilməsi sahəsində (bundan sonra – müvafiq sahə) fəaliyyət göstərəcək. 

Mərkəzin fəaliyyətinə ümumi rəhbərliyi və nəzarəti sədr də daxil olmaqla 5 (beş) üzvdən ibarət Müşahidə Şurası həyata keçirəcək. Cari rəhbərliyi Mərkəzin Müşahidə Şurasının vəzifəyə təyin və vəzifədən azad etdiyi İcraçı direktor həyata keçirəcək.

Mərkəzin saxlanma xərcləri və fəaliyyəti dövlət büdcəsi və qanunla qadağan olunmayan digər mənbələr hesabına maliyyələşir.

Nazirlər Kabinetinə, İqtisadiyyat Nazirliyinə və Maliyyə Nazirliyinə Mərkəzin fəaliyyəti ilə bağlı təşkilati və maliyyə məsələlərini həll etmək tapşırılıb. -02D-