İqbal Ağazadə Ağdaşda seçkilər zamanı pozuntularla bağlı şikayət etmək niyyətindədir

İyunun 19-da 90 saylı Ağdaş seçki dairəsində keçirilən təkrar parlament seçkilərində hakim Yeni Azərbaycan Partiyasının nümayəndəsi Cavid Osmanov liderlik edir. MSK-nın ilkin məlumatına görə, seçkilərdə iştirak edən seçicilərin 85,56%-i ona səs verib. Ümid Partiyasının lideri İqbal Ağazadə 7,84% səslə ikinci yerdədir.

Lakin İ.Ağazadənin sözlərinə görə, seçkilər kütləvi pozuntu şəraitində keçib. O bildirib ki, hər yerdə onun müşahidəçilərinə əngəl törədilib, seçicilər qorxudulub, “karusel”ə yol verilib. O, seçkilər zamanı pozuntularla bağlı şikayət etmək niyyətindədir.

Qeyd edək ki, C.Osmanov Ağdaş rayon administrasiyası rəhbərinin müavinidir.

90 saylı dairədən həmçinin 5 bitərəf öz namizədliyini irəli sürüb.

MSK 20 gün ərzndə seçkilərin rəsmi yekununu aparmalıdır. Bundan sonra Konstitusiya Məhkəməsi 10 gün müddətində nəticələri təsdiqləməlidir.

90 saylı Ağdaş seçki dairəsi üzrə təkrar seçkilər 1 noyabr 2015-ci il parlament seçkilərinin nəticələrinin ləğvilə əlaqədar təyin edilib. Seçkilərdə AGBank-ın rəhbəri Çingiz Əsədullayev qalib gəlib. Lakin səsvermə zamanı pozuntular olduğundan nəticələr ləğv edilib. Ancaq müxalifətçi namizədlərin çoxsaylı pozuntu faktları təqdim etmələrinə baxmayaraq, onlarla başqa dairədə belə qərarlar qəbul  edilməyib.  Qeyri-rəsmi məlumatlara görə, Ağdaşda seçkilərin ləğvinə Ç.Əsədullayevin keçmiş milli təhlükəsizlik naziri Eldar Mahmudova yaxınlığı səbəb olub.—06D--