İran səfiri Azərbaycan XİN-ə çağırılıb

Bakı/11.11.22/Turan: İranın Azərbaycandakı səfiri Seyid Abbas Musəvi bu gün, 2022-ci il noyabrın 11-də Azərbaycan Xarici İşlər Nazirliyinə (XİN) çağrılıb. Bu barədə nazirliyin yaydığı məlumatda deyilir.

Məlumata görə, səfirin Azərbaycan XİN-ə çağırılmasına səbəb kimi son zamanlar İran mediasında Azərbaycan əleyhinə aparılan təbliğat, qarayaxma kampaniyası göstərilib. Eyni zamanda, İranın yüksək vəzifəli siyasi və hərbi rəsmilərinin iki ölkə arasındakı münasibətlərin ruhuna uyğun olmayan təhdid xarakterli ritorikaları ilə bağlı narazılıq və narahatlıq səfirin diqqətinə çatdırılıb.

Səfirə bildirilib ki, Azərbaycanın Konstitusiya quruluşunun əsaslarına qarşı cinayət törətmiş və barələrində məhkəmənin qərarı ilə həbs qətimkan tədbiri seçilərək beynəlxalq axtarışa verilmiş Azərbaycan vətəndaşlarının İranda məskunlaşmalarına şərait yaradılmasının qəbuledilməzliyi və cinayətkarların təhvil verilməsinin zəruriliyi bir daha vurğulanıb.

Məlumatda deyilir ki, Azərbaycanda separatçılığı qızışdıran və cinayət təqibindən yayınaraq digər ölkələrdə gizlənən şəxslərin İran səfirliklərində qəbul edilməsinin qeyri-dost addım olduğu diqqətə çatdırılıb.

"İranda Azərbaycana qarşı bu kimi məlumatların yayımlanması və fəaliyyətin aparılması qəbuledilməzdir və ən qısa zamanda bunlara son verilməsi gözlənilir", deyə Azərbacan XİN0dən bildirilir. 05D