İran səfirinə Azərbaycanla münasibətləri yaxşılaşdırmaqla bağlı tapşırıqlar verilib

Bakı/04.01.22/Turan: İranın Azərbaycandakı səfiri Seyid Abbas Musəvi Tehrana çağırılıb, burada XİN başçısı Hüseyn Abdullahiana Tehran və Bakı arasında ikitərəfli münasibətlərin hazırki vəziyyəti, habelə gələcək gündəlik haqqında hesabat verib, bu barədə İran XİN-in məlumatında bildirilir.

İranın XİN başçısı Tehranın bütün qonşuları ilə yaxşı münasibətləri olduğunu bildirib. "O, Musəviyə iki ölkə arasında siyasət, iqtisadiyyat və mədəniyyət sahələrində münasibətlərin inkişafı və möhkəmləndirilməsi, yaxın gələcəkdə ikitərəfli iqtisadi komissiyanın uğurlu iclasının keçirilməsi üçün zəruri təlimatlar verib", deyə məlumatda bildirilir.

Xatırladaq ki, bundan əvvəl Musəvinin Azərbaycan prezidentinin köməkçisi Hikmət Hacıyevlə görüşü keçirilib, daha sonra Azərbaycan və İran XİN başçıları arasında telefon danışığı baş tutub.

Münasibətlərin istiləşməsi hər iki ölkənin dövlət KİV-ləri səviyyəsində bir neçə həftə davam edən qarşılıqlı ittihamlardan sonra baş verir. 02D