İranın energetika naziri elektrik enerjisi tədarükünü razılaşdırmaq üçün Bakıya gəlir

Bakı/04.07.22/Turan: Yaxın günlərdə Tehranda İran, Azərbaycan və Türkiyə XİN başçılarının görüşü keçiriləcək, bu barədə bazar ertəsi Tehranda keçirilən brifinqdə İran XİN başçısı Hüseyn Abdullahiyan bildirib. O, görüşün mövzusunu açıqlamayıb, yalnız "regional formatın" möhkəmləndirilməsinin vacibliyini qeyd edib, xəbəri İran KİV-ləri yayıb.

O, ikitərəfli münasibətlərə toxunaraq, energetika və tranzit sahəsinin inkişaf etdirilməsinin əhəmiyyətini vurğulayıb. Abdullahiyanın sözlərinə görə, bu, iran və Azərbaycan arasında iqtisadi əməkdaşlığın ən mühüm istiqamətləridir.

O, həmçinin iyulun 5-də İranın energetika nazirinin elektrik enerjisi mübadiləsi haqqında məsələnin razılaşdırılması və bu barədə razılıq əldə edilməsi məqsədilə Bakıya səfərinin gözlənildiyini bildirib.

"İran və Azərbaycan Respublikası son 10 ayda anlaşılmazlığı aradan qaldırıblar və danışıqları öz xalqlarının maraqları daxilində irəlilədirlər", deyə İran XİN başçısı qeyd edib.

Qarabağ münaqişəsinin beynəlxalq prinsiplər əsasında nizamlanmasına dəstək ifadə edən nazir Tehranın "Qarabağ münaqişəsi ilə bağlı qalan məsələləri ölkələrin ərazi bütövlüyünə uyğun şəkildə həll etməyə" hazır olduğunu bildirib. 02D