İsa Qəmbərə hücum olub

Bazar günü saat 14.30-da Lənkərana səfər edərkən yolda Müsavat Partiyasının başqanı İsa Qəmbər və təşkilatın rəhbərliyinə daxil şəxslərə hücum olub.

Onların səfərində məqsəd Müsavat Partiyasının Lənkəran rayon təşkilatının yaranmasının 20 illiyi münasibətilə təşkil olunan yubiley tədbirinə qatılmaq olub. Başqanla yanaşı maşında olan Arzu Səmədbəyli, Arif Hacılı, Gülağa Aslanlı, Tural Abbaslı, Sevinc Hüseynova və Valeh Hümbətoğlu öyrədilmiş adamların hücumu ilə üzləşib.

G.Aslanlı Turan-a bildirib ki, bir neçə maşın onların yolunu kəsib.

“Maşından düşən adamlar bizə hücum edib təhqirə başladılar. Maşınlara ziyan vurdular, hətta bizi ölümlə hədələdilər», - deyə Aslanlı bildirib.

Qadınların da olduğu kütləni mülki geyimli polislər idarə edib. Aqressiv kütlə müxalifətçilərdən rayonu tərk etmələrini tələb edib. «Onlar maşına yumurta atır, Lənkəranı tərk etməyi tələb edirdilər», - deyə Aslanlı əlavə edib.

Arif Hacılı bu hadisəni İsa Qəmbərə sui-qəsd kimi qiymətləndirib.

Onun fikrincə, İsa Qəmbərə hücum şənbə günü Bakıda keçirilən etiraz aksiyasında müsavatçıların aktiv iştirakı ilə bağlıdır.

DİN baş verənləri şərh etmir.    

Qeyd edək ki, yanvarın 4-də İsa Qəmbər Müsavat Partiyasının Məclisi tərəfindən 2013-cü ilin prezident seçkilərində namizəd irəli sürülüb.—06B—