İsamayıllı hadisələrində təqsirləndirilənlər döyüldüklərini deyiblər

Şəki Ağır Cinayətlər Məhkəməsində İsmayıllıda 2013-cü il yanvar iğtişaşları üzrə işlə bağlı ittiham olunan Tofiq Yaqublu (Müsavat Partiyası başqanının müavini), İlqar Məmmədov (ReAl Hərəkatının sədri) və digərlərinin dinləmələri davam edib.

Bugünki prosesdə 5 nəfər təqsirləndirilən şəxslər dindirilib. Onlar məhkəməyə verdikləri ifadələrində  bildiriblər ki, ibtidai istintaq zamanı onlardan ifadə alan zaman təzyiqlər olunub, döyülüblər.

Məhkəmədə özlərini təqsirli bilməyiblər.

Bu zaman təqsirləndirilən Qarabağ əlili eplepsiya xəstəsi Abdullayev Mirkazım ifadə verərkən huşunu itirib. Bundan sonra ona təcili yardım çağırılıb.

Məhkəmə prosesini izləməyə gələn İsa Qəmbər jurnalistlərə müsahibəsində bildirib ki, məhkəmədə günahsız insanlar mühakimə olunurlar.

Məhkəmə prosesi dekabrın 29-na təyin olunub. 

Bundan sonra təqsirləndirilənlər Gəncə İstintaq təcridxanasında deyil, yeni istifadəyə verilən Şəki İstintaq təcridxanasında saxlanılacaqlar.

Yanvarın 23-də İsmayıllıda “Çıraq” otelinin inzibatçısı Emil Şəmdinovun və onun tanışı Elməddin Məmmədovun sərxoş vəziyyətdə özgənin əmlakının zədələnməsi ilə müşayiət olunan qərəzli xuliqanlıq hərəkətləri etmələri və bununla əlaqədar hadisə yerinə toplaşmış bir qrup şəxs tərəfindən “Çıraq” hotelinin və müxtəlif markalı avtomobillərin yandırılması ilə nəticələnən kütləvi münaqişə, daha sonra kütləvi etirazlar baş verib.   

Etirazlar yanvarın 24-də yatırılıb. 18 nəfər həbs edilib. 

Tofiq Yaqublu, İlqar Məmmədov, həmçinin İsmayıllı rayon sakinlərinə qarşı Cinayət Məcəlləsinin 233 (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315.2-ci (hakimiyyət nümayəndəsinə qarşı müqavimət göstərmək və ya zor tətbiq etmək) maddələri ilə cinayət işi qaldırılıb və barələrində həbs qətiimkan tədbiri seçilib. -16D-