İslam Partiyasının sədr müavini həbsxanada vəfat edib

Bu gün səhər saatlarında İslam Partiyasının sədr müavini Vaqif Abdullayev Ədliyyə Nazirliyinin Penitensiar Xidmətinin müalicə müəssisəsində vəfat edib. Bu barədə Turan-a İslam Partiyasının Ali Məclisinin üzvü Natiq Kərimov bildirib. Onun sözlərinə görə, hazırda V. Abdullayevin cəsədi “Abşeronsu” xəstəxanasına gətirilib. 

    V. Abdullayev 12 saylı cəzaçəkmə müəssisəsində saxlanılırdı. 

    Penitensir Xidmətin mətbuat xidməti ölümün səbəblərini şərh etməyib.

   O, uzun müddətdir  astma və xərçəng xəstəliyindən əziyyət çəkirdi. Hüquq müdafiə təşkilatları V.Abdullayevin ağır xəstə olduğunu, onun həbsdən azad edilmədiyi təqdirdə həbsxanada vəfat edəcəyi barədə hökuməti xəbərdar edib. Lakin onların çağırışlarına məhəl qoyulmayıb.  

    V.Abdullayev 1951-ci ildə anadan olub. 2011-ci il yanvarın 7-də həbs edilib. CM-in 214.2.1 (qabaqcadan əlbir olan bir qrup şəxs, mütəşəkkil dəstə və ya cinayətkar birlik tərəfindən cinayətə hazırlıq); 214.2.3 (odlu silahdan və silah qismində istifadə olunan predmetlərdən istifadə etməklə cinayətə hazırlıq); 228.3 (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə); 278-ci (hakimiyyəti zorla ələ keçirmə və ya onu zorla saxlama) maddələri ilə ittiham olunub. Bakı Ağır Cinayətlər Məhkəməsinin 2011-ci il oktyabrın 7-də Vaqif Abdullayevi 11 il azadlıqdan məhrum edib.-03B-