İslamiadanın açılış mərasimində lazımsız təmtəraq olmayıb

Bakı/13.05.17/Turan: Cümə günü axşamdan keçmiş Bakı Olimpiya Stadionunda IV İslam Həmrəyliyi Oyunlarının təntənəli açılışı olub. Tədbir proqramı islamın və Azərbaycanın tarixini və mədəniyyətini, ölkənin çağdaş həyatını əks etdirib.

Stadionun səhnəsində hündürlüyü 28 metr olan iki minarə quraşdırılıb. Minarələrin üzərində İslam incəsənətinə xas həndəsi elementlərdən istifadə edilməklə mərkəzdəki altıbucaqlını bir-biri ilə bağlayan dairələr əks olunub.

Minarələrin birindən səslənən azan səsi və muğam ustası Alim Qasımovun ifası bəlkə də tədbirin ən təəssürat yaradan anı olub.

Stadionda "Harmoniya" adlanan süjet nümayiş etdirilib. Mina adlı bakılı qızcığaz babası ilə səhnəyə çıxıb. Filarmoniya bağından görüntülər ekrana gəlib. O, parkı dolanaraq ətrafdakı insanlara təbəssüm və nur bəxş edib. Sevinc hissi yaşayan bu qız bütün dünyada sülhün və harmoniyanın bərqərar olması barədə düşünür.

Mədəniyyət və inanc, irs və biliklər Minanın qəlbini sevinc hissləri ilə doldurur - bütün bunlar bu macəra zamanı onun daimi yol-yoldaşı gözəl çərpələng sayəsində mümkün olur.

"Mərasimin mərkəzində bakılı qızcığaz - Mina dayanır. Biz Mina və onun dostu çərpələngin köməyi ilə dünyanı kəşf etmək üçün səyahətə çıxırıq. O, yolboyu insanların özünəməxsusluğu və irsi, inancları və arzuları ilə tanış olur. Sonda onun gələcəyə ümidi bütövləşir və artır. Minanın hekayəti insanların qüdrətinin, birliyinin mücəssəməsidir. Onun arzusu sülh və harmoniyanın hökm sürdüyü daha yaxşı dünyadır. Artıq bir ildən çoxdur ki, mən Azərbaycan xalqının xeyirxahlığını və səmimiyyətini hiss edirəm, məni onun bu keyfiyyətləri ilhamlandırır", - mərasimin proqramının bədii rəhbəri Neytan M.Rayt AzərTac-a bildirib.

İki il öncə keçirilən Avropa Oyunları ilə müqayisədə bu tədbir daha sadə olması ilə seçilib. Tədbirin təşkili üçün xarici mütəxəssislər cəlb edilsə də Ledi Qaqa kimi dünya ulduzları dəvət olunmayıb.

Səhnə tərtibatı da sadə olub.

Azərbaycanın birinci vitse-prezidenti, "Bakı-2017" Təşkilat Komitəsinin sədri Mehriban Əliyeva iştirakçıları salamlayıb.

"Bu axşam biz İslam aləmini bir araya gətiririk. Azərbaycan bu ali missiyanı öz üzərinə götürməkdən fərəh hissi duyur. Biz minillikləri əhatə edən mədəniyyətə və güclü İslam ənənələrinə malik qədim diyarıq. Eyni zamanda, biz gənc, müasir və sürətlə inkişaf edən ölkəyik. Bu Oyunların qələbə qazanacaq atletlərinin təltif olunacağı medallardan tutmuş möhtəşəm açılış və bağlanış mərasimləri kimi yaradıcı elementləri zəngin mədəniyyətimizi ilhamlandıracaq", - M.Əliyeva vurğulayıb.

İslam Əməkdaşlıq Təşkilatının baş katibi Yusif Əl-Osaymin əmin olduğunu bildirib ki, bu tədbir İslam Əməkdaşlıq Təşkilatına üzv ölkələrdə idmanın təşviq olunmasına töhfə verəcək, İslam aləmində gənclərə dəstək olacaq.

Mərasim gecəyarısı atəşfəşanlıqla başa çatıb.-06D--