İsrail İranın raket zərbəsinə necə cavab verəcəyini götür-qoy edir

İranın raket zərbəsinə tez cavab veriləcəyi barədə vədlərə baxmayaraq, oktyabrın 2-də səhərə qədər İsrail qətiyyətli addım atmayıb. Gecə ərzində hərbi-siyasi kabinet iclas keçirib. İlk dəfə iclas böhran idarəetmə mərkəzi adlanan bunkerdə keçirilib.

Kabinetin iclası üç saata yaxın davam edib. İştirakçılara İranın hücumu barədə ətraflı məlumat verilib. Bu zərbə öz miqyasına görə aprel zərbəsindən böyük olub.

İştirakçılar razılaşıblar ki, cavab "əhəmiyyətli" olmalıdır, lakin İsrail KİV bildirir ki,  cavab zərbəsi üçün konkret variantlar hazırlanmayıb.  Bununla baş nazirin sədrliyilə məhdud çərçivədə forum məşğul olacaq.

Eyni mənbələrin sözlərinə görə, İsraildə başa düşürlər ki, cavab zərbəsi elə olmalıdır ki, İranı növbəti hərəkətlərdən çəkindirə bilsin. Lakin bundan ötrü amerikalılarla maksimum koordinasiya lazımdır, Ağ Ev isə İsrailin özünü müdafiə etmək hüququnu vurğulasa da, gələcək eskalasiyada maraqlı olduğunu bəlli etmir.

The Wall Street Journal nəşrinin məlumatına görə, artıq Tehrana məlumat verilib ki, İsrail "nüvə və ya neft obyektlərinə birbaşa zərbə ilə" cavab vermək niyyətindədir. İranda cavab olaraq bildiriblər ki,  daha böyük güc ilə cavab verəcəklər.

“Ynet” nəşrinin siyasi şərhçisi Nadav Eyal yazır ki, İsrail İrandakı nüvə obyektlərinə zərbələri istisna etmir. Eyni zamanda, Ağ Evin bu cür planlara veto qoyması çətin olacaq.

SAXAL-da işarə ediblər ki, Yaxın Şərqdəki hədəflərə cavab zərbəsinə hazırdırlar. Ancaq bu hücumun İranın özünə təsir edib- etməyəcəyi açıqlanmayıb. Gecə ərzində İsrail Hərbi Hava Qüvvələri Beyruta zərbələr endirib.

Oktyabrın 2-nə keçən xüsusi bəyanatla çıxış  edən hökumət başçısı Benyamin Netanyahu “ölümcül səhvə yol verən” İrana qətiyyətlə cavab veriləcəyini vəd edib.

"İran rejimi bizim özümüzü müdafiə etmək və düşmənlərimizə cavab vermək əzmimizi başa düşmür", - hökumət başçısı deyib. "Sinvar və Def bunu başa düşmədilər, Nəsrullah başa düşmədi və yəqin ki, Tehranda bunu başa düşməyənlər var, amma onlar da başa düşəcəklər".

“Ynet”in hərbi köşə yazarı Ron Ben-İşay hesab edir ki,  eskalasiyanın əsas düşməni regional müharibəyə qarşı qətiyyətlə  çıxan Ağ Evdir. Əgər İsrail zərbə endirərsə, Amerikanın maraqlarına qarşı çıxacaq. Buna görə Qüdsdə cavab zərbəsi üçün hədəflər düşünülmüş şəkildə hesablanır. Bu hədəflər hansı olacaq? Ən mühüm məsələ budur, bəlkə də bütün regionun gələcəyi bundan asılıdır.