İsrail tankları Dəməşqdən 20 km məsafədə

Ötən gecə ərzində və dekabrın 10-da səhər İsrail ordusu Suriya ərazisində hərbi obyektlərə kütləvi zərbələr endirməyə davam edib, xəbəri xarici KİV-lər yayıb. 

Holan təpələri yaxınlığındakı Bufer zona ələ keçirildikdən sonra İsrailin zirehli texnikası Suriyanın dərinliklərinə doğru hərəkəti davam etdirir və artıq Dəməşqdən 20 km cənubdadır.

50 il ərzində ilk dəfə Suriya ordusunun HHQ və HDQ bazaları aviazərbələrlə vurulub. Son iki gün ərzində 300-ə yaxın hədəfə hücum olunub, təyyarə və helikopter eskardiliyaları tamamilə məhv edilib, döyüş gəmiləri batırılıb.  

Eyni zamanda müdafiə müəssisələrinə, tədqiqat mərkəzlərinə və Livana keçirilməyə cəhd olunan silah daşıyan konvoylara zərbələr endirilir. 

Aviasiya ilə yanaşı, İran və Rusiya tərəfindən tədarük olunmuş RƏM sistemləri məhv edilir. 

Son iki gündə Dəməşqdən onlarla rus diplomat təxliyə olunub, səfirliyin binasından Rusiya bayrağı çıxarılıb. Suriyada Rusiyanın daimi hərbi iştirakı da başa çatır. Rus gəmiləri Tartusdakı bazanı tərk edib, Latakiyadakı bazadan texnika çıxarılır.

Uzun illər boyunca Suriyada iştirakını möhkəmləndirən iranlılar da öz birləşmələrini ölkədən çıxarır. Ayətullah rejimi böyük itkilər, o cümlədən nüfuz itkiləri verir.