İstintaq Təcridxanasında  “Abzas Media”  rəhbərlərinin yaxınları ilə telefon danışıqları və görüşləri qadağan edilib

Bakı/25.11.23/Turan:  İstintaq “Abzas Media” İnternet nəşrinin direktoru və baş redaktoru, həbs edilmiş Ülvi Həsənli və Sevinc Vaqifqızına  yaxınları ilə telefon danışıqlarına və görüşlərə qadağa qoyub. Bu barədə onların vəkilləri bldiriblər.

“Ülvi Həsənlinin saxlanma şəraitilə bağlı şikayəti yoxdur, lakin cinayət işi üzrə müstəntiqin qərarına görə yaxınları ilə ünsiyyət saxlaya bilmir. Biz bu qadağanı əsassız hesab edirik və istintaqın bu qərarından şikayət verəcəyik", - vəkil vəkil Zibeyd Sadıqova Turan-a bildirib.

“İstintaq Sevinc Vaqifqızının yaxınları ilə görüş və telefon danışığı hüququnu qanunsuz olaraq məhdudlaşdırıb. Biz bu qərara etiraz edəcəyik. Sevinc Vaqifqızının saxlanma şəraitilə bağlı şikayəti yoxdur, lakin o, ittihamı rədd edir və onu jurnalist araşdırmaları ilə əlaqələndirir", -  jurnalistin vəkili Aqil Layıc bildirib.

Hər iki jurnalistin həbsindən apelyasiya şikayəti verilib.

Bu iş üzrə həbs edilmiş fəal Məhəmməd Kekalovun yaxınları deyiblər ki, onun qohumları ilə telefon danışıqlarına və görüşlərə qadağa qoyulub-qoyulmadığını hələlik bilmirlər.

Onlar qeyd ediblər ki, M.Kekalov həbsdən sonra doğmalarına bir dəfə olsun zəng etməyib.

Fəalın ailəsi bildirib ki, onun həbsilə bağlı Apellyasiya Məhkəməsinə şikayət veriləcək. – 06B-