İsveç Ukraynanın iqtisadi uğuruna inanır

Kiyevdə “Gələcəyin dərinləşdirilmiş və hərtərəfli azad ticarət zonaları: Aİ Şərq Tərəfdaşlığı ölkələrində inkişafa və rifaha necə şərait yarada bilər?” mövzusunda ikigünlük konfrans öz işinə başlayıb.

İsveç XİN-in dəstəyi ilə keçirilən konfransın təşkilatçıları Stokholm Keçid İqtisadiyyatı İnstitutu və Kiyev İqtisadiyyat Məktəbidir.

Konfrans Avropa İttifaqının Ukrayna, Gürcüstan və Moldova ilə dərin və hərtərəfli azad ticarət zonasının (DCFTA) yaradılması prosesinə həsr edilib.

Ukrayna sazişin imzalanmasına heç vaxt olmadığı qədər yaxındır. Hələ keçən il Kiyev sazişi paraflayıb, amma dekabrda Yanukoviç hökuməti Aİ ilə Assosiasiya sazişi, xüsusən DCFTA sazişi imzalamaqdan imtina etdikdən sonra o, pozulub.

Yeni seçilmiş prezident Petr Poroşenko vəzifəyə başladıqdan dərhal sonra təxirə salınmış sazişlərin tezliklə imzalanacağını bəyan edib.

İsveçin Ukraynadakı səfiri Martin Haqstrom Ukraynanın Aİ-yə uğurlu iqtisadi inteqrasiyasına inanır.

Çərşənbə günü konfransda çıxış edən Haqstrom Ukraynanın iqtisadi perspektivi haqqında 4 nikbin proqnoz verib.

“Birincisi, azad ticarət Ukrayna üçün 6 aparıcı dünya iqtisadiyyatının daxil olduğu 500 mln. əhalisi olan bazar açacaq, deyə o bildirib.

İkincisi, Ukrayna iqtisadiyyatına investisiya axını güclənəcək, üçüncüsü, Şərqi Avropa ölkələrinin transformasiyası təcrübəsi göstərir ki, Ukrayna ÜDM-in sürətli inkişafı təmin ediləcək və dördüncüsü, bu, artıq öz məhsulunun 25%-ni Aİ-yə ixrac edən Ukrayna biznesinin möhkəmlənməsinə gətirib çıxaracaq”.

O, həmçinin qeyd edib ki, Ukrayna iqtisadiyyatı 90-cı illərin əvvəllərindən 40% artıbsa, Latviya iqtisadiyyatı 340% artıb.

Haqstrom öz nikbinliyini iyunun 5-də Kiyevdə İsveçin 25 böyük şirkətinin və hökumət nümayəndələrinin iştirakı ilə İsveç-Ukrayna biznes forumunun keçiriləcəyi haqqında məlumatla əsaslandırıb.

O, həmçinin qeyd edib ki, İsveç Ukraynaya investisiyalarının həcminə görə ilk 10 ölkə arasındadır. 2012-ci ilin yekunlarına görə investisiya məbləği 1,7 mlrd. dollar təşkil edib.

 Konfransda həmçinin qeyd edilib ki, DCFTA həyata keçirilməsi ticarət maneələrinin aradan qaldırılması və Avropa norma və standartlarının tətbiq edilməsi sayəsində qarşılıqlı ticarətin güclənməsinə gətirib çıxaracaq.

Kiyev İqtisadiyyat Məktəbinin Prezidenti Corc Loquş qeyd edib ki, Ukrayna və digər Şərq Tərəfdaşlığı ölkələrinin iqtisadiyyatlarının Aİ daxili bazarı ilə inteqrasiyası onların sürətli inkişafına şərait yaradacaq.

Konfransda Şərq Tərəfdaşlığı ölkələrinin, o cümlədən Azərbaycanın ekspertləri və hökumət nümayəndələri iştirak edir. -0-