Ivanka Tramp 15 yaşlı azərbaycanlı ixtiraçını alqışlayıb

Bakı/28.11.17/Turan: ABŞ prezidenti Donald Trampın baş müşaviri və Hindistanda keçirilən Qlobal Sahibkarlıq Sammitindəki (QSS) nümayəndəsi İvanka Tramp Azərbaycandan olan 15 yaşlı Reyhan Camalovanı yağış suyundan enerji istehsal edən şirkət yaratması münasibətilə təbrik edib. ABŞ-ın Azərbaycandakı səfirliyinin noyabrın 28-də yaydığı açıqlamada belə deyilir.

İ.Tramp çıxışında bu haqda deyib: "Azərbaycandan olan Reyhan Camalova da bu gün bizimlə birlikdədir. Reyhanın 15 yaşı var, lakin belə gənc yaşda olması onu yağış suyundan enerji istehsal edən şirkəti yaratmaqdan çəkindirmədi.

Reyhanın güclü bir şüarı var - "Hər dəfə bir evi işıqlandır". "Reyhan, sənin işıqlandırdığın hər bir ev dünyanı işıqlandırır. Sənin parlaq zəkan və gərgin əməyin bizim hamımızı ruhlandırır. Təşəkkür edirəm, lütfən, ayağa qalx".

QSS dünyanın hər yerindən yeni sahibkar, sərmayəçi və dəstəkləyiciləri bir araya gətirən məşhur ənənəvi illik sahibkarlıq tədbiridir. GES-2017 innovatorları, xüsusən də qadın innovatorları gücləndirmək və onların ideyalarına dəstək göstərmək üçün bir mühit yaradacaq. İki gün yarım ərzində şəbəkələşmə, mentorluq və seminarlar vasitəsilə sahibkarlar öz təşəbbüslərini tərtib edərək tərəfdaşlıq qurmaq, maliyyələşməni təmin etmək, yenilik etmək və hədəf müştərilərini tapmaq imkanları əldə edir, cəmiyyətləri dəyişəcək yeni məhsullar və xidmətlər yaradır.

ABŞ Dövlət Departamenti Reyhan və onun mentoru Leyla Tağızadənin səfərini və QSS-də iştirak xərclərini bütövlükdə öz üzərinə götürüb.

Açıqlamada R.Camalovanın layihəsinin mahiyyəti barədə də məlumat verilir.

Tədqiqatlar göstərir kı, dünyada milyardlarla litr yağış suyundan düzgün istifadə olunsa o zaman ondan potensial enerji kimi istifadə etmək olar. Bu problem həll etmək üçün R. Camalova öz məktəbli dostları və fizika müəllimləri ilə birlikdə yağış suyundan enerji isehsal edən Reynerci (Rainergy) qurğusunu yaradıblar. Qurğu dörd əsas hissədən: yağış suyunun kollektoru, su çəni, elektik generatoru və batareyadan ibarətdir. Yağış suyu kollektoru su çənini yağış suyu ilə doldurur, su isə elektrik generatorunun içi ilə böyük sürətlə axaraq elektrik enerjisini yaradır. İstehsal olunan enerji akkumulyatorlarda toplanır, elektrik şəbəkəsinin xətlərinə düşən təzyiqi azaldır və ehtiyacı olan icmalara elektrikdən istifadə etmək üçün əlavə mənbə verir.05D-