Jan Klod Minyonun xüsusi missiyası

Mayın 26-da prezident İlham Əliyevlə Avropa Şurası Parlament Assambleyasının  (AŞPA) rəhbəri Jan Klod Minyonun görüşündə Azərbaycanın Avropa Şurası Nazirlər Komitəsində qarşıdakı sədrliyi məsələsi müzakirə olunub. 

Dövlət başçısının saytı xəbər verir ki, görüş zamanı İ.Əliyev əmin olduğunu bildirib ki, Minyonun səfəri əməkdaşlıq perspektivləri ilə bağlı məsələlərin müzakirəsinə yaxşı imkanlar yaradır.

Öz növbəsində Minyon bildirib ki, səfərdə əsas məqsədlərdən biri “Azərbaycanın Avropa Şurası Nazirlər Komitəsində qarşıdakı sədrliyinə hazırlıq prosesinə dair fikir mübadiləsinin aparılmasıdır.

AŞ  Nazirlər Komitəsində yarım illik sədrlik Azərbaycana 2014-cü ilin mayında keçməlidir.

Lakin Avropa Şurası strukturlarında belə narahatlıq var ki, insan hüquqları sahəsində ciddi problemləri olan Azərbaycanın sədrliyi götürməsi təşkilatın imicinə ziyan vura bilər və demokratik ictimaiyyətin tənqidinə səbəb olar.

Bununla bağlı Strasburq Bakıya müxtəlif missiyalar göndərir ki, Azərbaycan hakimiyyətini demokratik azadlıqların və insan hüquqlarının təminat edilməsi üzrə ciddi addımlar atmağa, siyasi məhbuslar məsələsini həll etməyə razı salsın.

Apreldə Nazirlər Komitəsinin Monitorinq Qrupunun səfirlərindən ibarət qrup Bakıya gəlib. Ötən həftə AŞ-nin insan hüquqları üzrə komissarı səfər edib, indi də AŞPA rəhbəri özü gəlib.

Qeyd edək ki, əvvəlki iki missiya prezident İlham Əliyevlə görüşməyib.–06D--