Obamanın müşavirlərini, konqresmen və senatorları Bakıya gətirən nədir?

Mayın 28-29-da Bakıda Azərbaycan-Amerika qurultayı adlı maraqlı tədbir keçiriləcək. Tədbirdə amerikalı konqresmen və ekspertlərdən ibarət böyük qrup iştirak edəcək. Onların arasında prezident Obamanın keçmiş müşaviri Devid Plaf da var. O 2009-cu ildə İlham Əliyevin ikinci dəfə prezident seçilməsinə məhdudiyyətin ləğvi məqsədilə keçirilən mübahisəli referendum ərəfəsində Bakıya gəlmişdi. O zaman Ağ Evin mətbuat katibi Robert Qibbs bildirmişdi ki, Plaf Bakıya qeyri-rəsmi şəxs kimi hökümətyönlü QHT-nin təbirində iştirak etmək üçün gəlib. Sonradan Plaf bəyan etmişdi ki, ABŞ Milli Demokratik İnstitutuna 50 min dollar verir və o bilmirdi ki, onu Bakıya hökumətyönlü QHT dəvət edib.

Dörd ildən sonra Devid Plaf, Robert Gibbs və onlarla birlikdə bir çox tanınmış siyasətçi və ekspert hakimiyyətin dəvəti ilə məruzəçi qismində Bakıya gəlir. 

Plaf “ABŞ və onun müttəfiqləri: ümumi maraqlar və dəyərlər, Gibbs isə “Ağ Ev – millət və dünya” mövzusunda çıxış edəcəklər. İkigünlük tədbiri Kamal Oksuz (görüşün təşkilatçısı) və Coşua Uoker keçirəcəklər. Bu barədə tədbirin rəsmi saytında bildirilir.

Onlardan başqa Ağ Ev qərargahının rəhbərinin keçmiş müavini Cim Messina, ABŞ-ın fəaliyyətdə olan vitse-prezidenti Co Baydenin bacısı Valeri Bayden Ouens və Pentaqon rəhbərinin müavini Pol Vulfovits çıxış edəcəklər.

Tədbirin sponsorları arasında  SOCAR, Praktik Solutions Group, BP, Caspian Drilling Company (CDC) və digər şirkətlər var.

"Biz bilmirik, Obamanın keçmiş müşavirləri və ABŞ vitse-prezidentinin bacısı öz çıxışlarına görə pul alacaqlar ya yox və ya onlar biznes imkanları axtarırlar ya yox. Lakin Bakıya uzun bir yol pulsuz mümkün deyil”- Turan-ın Vaşinqton müxbirinə Amerika diplomatiyasının veteranlarından biri bildirib. 

Bu ilin yanvarına qədər Barak Obamanın baş məsləhətçisi olan Plaf qrup və şirkətlərdən qonorar almaqda tənqid edilirdi. Ötən il o,  İran və Suriya ilə bağlı şirkətdən 100,000 dollar almaqda ittiham olunub.

Mayın 28-də bir qrup senator və konqresmen,  o cümlədən Amerika Birləşmiş Ştatlarının yüksək nümayəndə heyəti  "Yaxt Klub"da SOCAR prezidenti ilə görüşəcək.

Mayın 29-da açılış mərasimi və “ABŞ-Azərbaycan münasibətləri: gələcəyə ortaq  baxış” mövzusunda plenar iclas keçiriləcək.

Maykl Rubin, Corc Fridmen, Metyu Brayza, Nil Braun, Bernard Vaynşteyn, Daniel Steyn, Maykl J. Kane, Devid Merkel, Geffri F.Greş, Stiven E. Hanson, Aleks Vatanka, Jeff Mankoff, senator Riçard Luqar, Bill Riçardson, Duncan McNabb və digərləri  dörd mövzu üzrə iclaslarında iştirak edəcəklər:

- “ABŞ - Azərbaycan strateji tərəfdaşlıq: Azərbaycana qarşı ABŞ-ın siyasəti”

-  "Xəzər regionu və Avropanın enerji təhlükəsizliyi: dünyanın enerji təhlükəsizliyi dinamikasının dəyişdirilməsi: Cənub enerji dəhlizi üçün yeni imkanlar"

- “Şərq və Qərb arasında Azərbaycan”

- “Avrasiya təhlükəsizlik və əməkdaşlıq: Azərbaycanın regional sülh və sabitlikdə rolu".

  Yekun iclas "ABŞ və Azərbaycan arasında strateji tərəfdaşlıq: növbəti addımlar" mövzusuna həsr olunacaq.

  Məruzəçilər arasında konqresmenlər Ted Po, Şeyla Cekson Li, Qreqori Miks, İvett Clark, Stiv Stokman, Jim Breydensteyn, Maykl L. Grişem,  Debbi Rodella, Jonatan Barnett, Ronald Uolters və başqaları var.

  Senatorlardan Jeyn Devis, Kampfild Staysi, Jim Devis, Rid Kabalina, Philip Merfi, Elis Jonson, Joli Yustus və başqaları iştirak edəcək.

  Bu qədər çox konqresmen və senatorun Bakıya getməsinin səbəbləri ilə bağlı Turan-ın sualı cavabsız qalıb. Daha doğrusu, bu ofislərdə şərh üçün SOCAR-ın Vaşinqtondakı ofisinə və Azərbaycan səfirliyinə müraciət etmək tövsiyə edilib.

  Görünür, bu cür tədbirlər öz daxili siyasətini gücləndirmək üçün avtoritar dövlətlər tərəfindən ödənilir. Bu nadir hal deyil, standart haldır, - amerikalı lobbiçilərdən biri bildirib.

  Qeyri-rəsmi məlumatlara görə, qonaqların ümumi sayı 75 nəfərdir. Bir məsələ aydın deyil:  bu tədbir Azərbaycana neçəyə başa gələcək?-025V-