JMK Pərviz Həşimlinin həbsini pisləyir və onun azad edilməsinə çağırır

Nyu-Yorkda yerləşən Jurnalistləri Müdafiə Komitəsi (JMK) “Bizim yol” qəzetinin əməkdaşı və moderator.az  saytının rəhbəri Pərviz Həşimlinin həbsini pisləyib. Bəyanatda qeyd olunur ki, P.Həşimli sentyabrın 17-də uydurma qaçaqmalçılıq və qanunsuz silah, partlayıcı maddə saxlamaqda ittiham olunur.

Sənəddə deyilir ki, MTN əməldaşları P.Həşimlinin evində və işlədiyi redaksiyaların  ofislərində axtarış aparıblar.

Mənzildə axtarış məhkəmənin qərarı və jurnalistin vəkilinin iştirakı olmadan aparılıb.

Maşınından 6 tapança və patron tapılan hansısa Təvəkkül Qurbanov bildirib ki, silahı P.Həşimliyə onun sifarişi ilə gətirib. P.Həşimli həmin adamı tanımadığını bildirib. 

P.Həşimlinin çalışdığı hər iki nəşr korrupsiya probleminin və insan hüquqlarının pozulması faktlarının işıqlandırılması ilə tanınır. 

JMK diqqəti prezident seçkiləri ərəfəsində jurnalistlərin həbsinə yönəldir. 

Təşkilat Azərbaycan hakimiyyətini seçkilərin legitimliyində maraqlıdırsa mətbuat azadlığını təmin etməyə çağırır.

“Biz Azərbaycan hakimiyyətini Pərviz Həşimlini azad etməyə və bütün ittihamları onun üzərindən götürməyə, həmçinin müsadirə olunmuş materialları və avadanlıqları “Bizim yol” qəzetinə və  moderator.az saytına qaytarmağa çağırırıq”, -  JMK-nın Şərqi Avropa proqramları üzrə koordinatoru Nina Oqnyanova bildirib.

JMK qeyd edir ki, son illər Azərbaycanda mətbuat azadlığının vəziyyəti xeyli pisləşib. JMK tənqidi səsləri boğmaq məqsədilə hakimiyyətin uydurma cinayət işlərindən, o cümlədən terrorizm, qanunsuz narkotik maddənin saxlanması, silah qaçaqmalçılığı kimi ittihamlardan istifadə etməsilə bağlı bir neçə fakt qeydə alıb. Ən azı 8 jurnalist korrupsiya, insan hüquqlarının pozulması kimi həssas problemlərə dair reportajlara görə həbsxanaya salınıb. 06D--